Atyraýdaǵy etnosaıabaqta qolóner buıymdarynyń jármeńkesi ótti
Atyraý qalasynyń mańyndaǵy Erkinqala aýyldyq okrýginde «Nurly Tal» etnografııalyq saıabaǵy bar. Atalǵan saıabaqta Naýryz merekesine oraı «Ulystyń uly kúni» atty merekelik is-shara ótti.
Saıabaqta birneshe kıiz úı tigilip, ulttyq taǵamdar usynyldy. Kelýshilerdi qolóner buıymdarynyń jármeńkesi qyzyqtyrdy.
«Shyǵys halyqtary úshin Naýryz meıramy – jańa jyldyń bastaýy. Bul kúni tabıǵat jańaryp, qystan aman shyqqan jurt aǵaıyn-týysymen, dos-jaranymen qýanysa qaýyshady. Merekede qala turǵyndaryna erekshe kóńil kúı men umytylmaıtyn estelik qaldyrýdy jón kórdik. Osy maqsatta «Smart Ana» qyz-kelinshekter damý ortalyǵynyń qoldaýymen jáne Atyraý qalasyndaǵy demeýshilerdiń kómegimen qolóner buıymdarynyń jármeńkesin ótkizdik. Turǵyndar merekelik kontsertti jyly qabyldady. Qazaqtyń ulttyq qolóner buıymdaryn, ulttyq naqyshtaǵy otandyq ónimderdi qoldaýǵa atsalysty», - deıdi «Smart Ana» áıel-qyzdar damý ortalyǵynyń dırektory Dınara Vaısova.
Sondaı-aq, merekelik is-sharada vıktorınalyq suraqtar qoıyldy. Onyń durys jaýabyn tapqandarǵa arnaıy syılyqtar tapsyryldy. Jurtshylyq nazaryna ulttyq oıyndar usynyldy.
Eske sala ketelik, budan buryn atyraýlyq oqýshy qyz Darııa Bolattyń asaý úıretip, at ústinen sadaq atatynyn habarlaǵan bolatynbyz. Atqa qumar oqýshy qyz kúnine 4-5 saǵatyn tulparyn baptaýǵa arnaıdy. Jem-shóbin, sýyn jańartyp, serýenge alyp shyǵady.
«Bizdiń aýylda atqa minýdi serik etken 10-ǵa jýyq er bala bar. Sol uldarmen birge men de atqa minýdi úırenshikti ádetime aınaldyrdym. Tulparymnyń qasynda júrsem, ýaqyttyń qalaı tez ótkenin ańǵarmaı qalamyn. Bolashaqta ulttyq at sportynyń órkendegenin qalaımyn. Sol sebepten, oǵan ózimniń úlesimdi qosqym keledi. Osy maqsatymdy iske asyrý úshin Almatydaǵy qazaq qyzdar pedagogıkalyq ýnıversıtetine oqýǵa túsýge daıyndalyp júrmin. Joǵary bilim alyp, ulttyq sportty damytýǵa qyzmet etetin bilikti maman bolǵym keledi», - dep maqsatymen bólisti ol.
