Atyraýdaǵy Elbasy kórmesine kelýshiler qatary kóbeıdi
ATYRAÝ. QazAqparat - Atyraýdaǵy Sh.Sarıev atyndaǵy kórkemsýret jáne qoldanbaly-sándik óner mýzeıinde ashylǵan «N.Nazarbaev: dáýir, tulǵa, qoǵam» atty kóshpeli qor kórmesine kelýshiler sany kóbeıdi, dep habarlaıdy QazAqparat tilshisi.
Kóshpeli kórmeni tamashalaýǵa kelgenderdiń qatarynda Atyraý qalalyq múgedekterdi saýyqtyrý ortalyǵynan kelgen azamattar da bar. Múmkindigi shekteýli jandar Elbasy kitaphanasynyń arhıv, kitaphana, mýzeı qorlarynyń materıaldaryn, N.Á.Nazarbaevtyń joǵary memlekettik nagradalarynyń biregeı jınaǵy, memleket basshylary jáne qazaqstandyq avtorlar tartý etken qoltańbasy bar kitaptar, shet tilderge aýdarylǵan eńbekterin tamashalap, erekshe áserge bólendi.
«Elbasy kórmesiniń óz ólkemizge kelýi - erekshe oqıǵa. Mýzeıden elimizdiń tutas tarıhyna kýá bolyp otyrmyz. Qundy jádigerlermen tanysyp, erekshe áserge bólendik. Ásirese, Elbasymyzdyń syn saǵattarda qol qoıǵan eldiń taǵdyryn sheshýdegi basty ról atqarǵan qujattardyń túpnusqasy, kóptegen foto jáne vıdeo materıaldaryn erekshe yqylaspen tamashaladyq» deıdi olar.
Ekskýrsııa júrgizýshisi Dınara Esqazıevanyń aıtýynsha, 18 qyrkúıek pen 11 qazan aralyǵynda kórmeni 52184 adam tamashalaǵan.
«Elbasy kórmesin turǵyndar zor yqylaspen tamashalaýda. Balabaqsha tárbıelenýshilerinen bastap, oqýshylar men stýdent jastarǵa deıin túrli sanattaǵy kelýshilerge arnalǵan ekskýrsııalar uıymdastyrylýda» deıdi ol.
