Atyraýdaǵy «Bolashaq» qondyrǵysynyń alańynda 1 mln tonna kúkirt zańsyz saqtalǵan
Ekologııalyq retteý jáne baqylaý komıteti baspasóz qyzmetiniń aqparatyna qaraǵanda, Atyraý oblysy boıynsha ekologııa departamenti «Nort Kaspıan Opereıtıng Kompanı N.V.» kompanııasynyń qyzmetine tekserý júrgizgen.
«Tekserý ekologııalyq zańnama talabyn buzýshylyqtardy anyqtady. Máselen, «Bolashaq» MKQK qoıma alańdarynda 1 mln tonnadan astam kólemde kúkirtti normatıvten tys ornalastyrý júzege asyrylyp otyr. Kelisilgen jobalyq qujattarsyz jáne ekologııalyq ruqsatsyz paıdalanylǵan siltini qalpyna keltirý úshin kúkirt qyshqylyn saqtaýdyń ýaqytsha alańy paıdalanylǵan. Qorshaǵan ortany qorǵaý jónindegi is sharalar jospary tolyq kólemde oryndalmaı otyr», -dep habarlady komıtettiń baspasóz qyzmeti.
Sondaı-aq, aǵyndy sýlardy tıisti tazartýsyz býlandyrǵysh toǵanǵa aǵyzý júzege asyrylǵan. Memlekettik ekologııalyq saraptama qorytyndysynda kózdelgen talaptardy oryndalmaǵan. Qorshaǵan ortany qorǵaý salasyndaǵy ýákiletti organnyń kelisiminsiz shlam aýlaǵyshty qaıta beıindeý júzege asyrylǵan.
Tazartylmaǵan shıki gazdy alaýlarda ekologııalyq ruqsatsyz jaǵý júzege asyrylǵan. Ruqsat qujattary joq TKJO obektisiniń býlaný syıymdylyqtarynda óz betinshe emıssııalar júzege asyryldy. Osy faktiler boıynsha kompanııaǵa qatysty QR Ákimshilik quqyqbuzýshylyq týraly kodeksiniń 324, 325, 326 jáne 328-baptarynyń 1-bóligimen, 331-babynyń 3-bóligimen, 332-babynyń 2-bóligimen ákimshilik is qozǵaldy. Qazir ákimshilik is Atyraý qalasynyń ákimshilik sotynda qaralyp jatyr», -dep málim etti komıtettiń baspasóz qyzmetinen.
Eske sala ketelik, budan buryn Atyraý oblysyndaǵy «Bolashaq» qondyrǵysynda «Qashaǵan» munaıyn daıyndaý toqtap turǵanyn habarlaǵan edik.