Atyraýdaǵy blokposttar brondalǵan tehnıkamen kúsheıtildi

ATYRAÝ. QazAqparat – Atyraý qalasynyń 4 baǵytyna qoıylǵan blokposttarda tájirıbeli áskerıler kezekshilik atqarýǵa kiristi, dep habarlaıdy QazAqparat.

«Batys» óńirlik qolbasshylyǵy basqarmasy baspasóz qyzmetiniń habarlaýynsha, Atyraýdaǵy 4 blokpostta 60-qa jýyq áskerı qyzmetshi eki aýysymmen kezekshilikti atqarýǵa kirisken. Áskerıler kezekshilikti polıtsııa qyzmetkerlerimen birge atqarady. Olardyń blokposttardaǵy qyzmetin kúsheıtý maqsatynda 4 «Arlan» brondyq tehnıkasy bólingen.

«Shekteý beketterine tájirıbeli áskerı qyzmetkerler tartyldy. Olar qazirgi qalyptasqan jaǵdaıdy jáne aımaqqa qandaı qaýip tónip turǵanyn jaqsy túsinedi. Áskerı qyzmetshiler túrli qyzmettik jaǵdaılarda durys sheshim qabyldap, halyq ıgiligine qyzmet etýge ázir» -dedi «Batys» óńirlik qolbasshylyǵy áskerleriniń qolbasshysy Nurlan Aldııarov.

Buǵan deıin «Batys» óńirlik qolbasshylyǵynan nysandardy dezınfektsııalaýǵa, qalany patrýldeýmen birge, blokposttardy kúsheıtý úshin tıisti daıyndyǵy bar kelisimsharttaǵy áskerı qyzmetshiler tartylǵan bolatyn.