Atyraýdaǵy bazarlarda dezınfektsııalyq dáliz ornatyldy

ATYRAÝ. QazAqparat –Atyraý qalasyndaǵy «Dına», «Kóktem», «Saraıshyq» bazarlarynyń kireberisine dezınfektsııalyq dáliz ornatyldy, dep habarlaıdy QazAqparat.

«Bul – dáliz Túrkııadaǵy dezınfektsııalaý ornynyń balamasy. Dálizder jergilikti kásipkerlerdiń jobasymen jasaqtaldy. Onyń janynda dezınfektsııalyq eritindi saqtalatyn ydys bar. Eritindi Atyraý qalalyq taýarlar men qyzmetterdiń sapasy men qaýipsizdigin baqylaý basqarmasynyń sanıtarlyq mamandarynyń usynymy negizinde ázirlendi. Adamdar úshin esh qaýpi joq. Suıyqtyqtyń quramynda 30 paıyzdyq spırt eritindisi bar. Bul týraly mátin osy oryndardyń barlyǵynda ilýli tur», dedi Atyraý qalalyq ákimdiginiń resmı ókili Álibek Naýarov.

Máselen, «Saraıshyq» kommýnaldyq bazarynyń kireberisinde aldymen turǵyndardyń qyzýy teplovızormen ólshenedi. Sonan soń dezınfektsııalyq dáliz arqyly ótedi.

Mamandardyń aıtýynsha, dezınfektsııalyq dáliz adamdardyń kıiminiń qyrtysyndaǵy qaýipti patogenderdi joıýǵa múmkindik beredi.