Atyraýdaǵy barlyq mekteptiń mańyndaǵy jol syzyqtary jańartyldy
«Buǵan deıin de jol ınfraqurylymy elementterin jańartý boıynsha aýqymdy jumys júrgizilgen bolatyn. Biraq jańbyr men qardyń áserinen birte-birte jol elementteriniń barlyǵy jaramsyz bolyp qalady, ne bolmasa olardy kórý qıynǵa soǵady. Sondyqtan jańa oqý jylynada dástúrge oraı oqý oryndarynyń mańynda zebralar men jol syzyqtaryn, belgilerdi retke keltirý jumystary júrgiziledi. Mektepterdiń janyndaǵy ótkelder ǵana emes, sonymen qatar balalar mektepke barǵan kezde jıi júrip ótetin joldarǵa da syzylady. Bul joldardyń barlyǵy arnaıy qadaǵalanady. Bıylǵy jumys tamyz aıynda bastaldy. Oqý jyly bastalǵanǵa deıin polıtsııanyń nusqaýyna sáıkes saladaǵy mamandandyrylǵan qurylys kompanııalarynyń biri mektepterdegi jaıaý júrginshiler ótkelinde júzge jýyq jol belgilerin ornatqan. Jasandy kedir-budyrlar da jańartyldy», - dep málimdedi qala ákimdiginiń baspasóz qyzmeti.
Atyraý oblysy polıtsııa departamenti baspasóz qyzmetiniń habarlaýynsha, qala mańyndaǵy 11 mekteptiń aınalasyna jol belgilerin ornatý jumystary aıaqtalǵannan keıin jol syzyqtary da jańartylady. Buryn qala mańyndaǵy aýyldardaǵy mektepterdiń kópshiliginde mundaı múmkindik bolmaǵan. Sebebi, mektepterdiń janynda asfalt tóselgen joldar bolmaǵan. Sońǵy jyldary qalada qarqyndy qurylys jumystary júrgizilýde. Qazir mektepterdiń kóbiniń aınalasyndaǵy joldar jaqsy. Sondyqtan, mektep mańyna joldan balalar ótetin ótkel salýǵa múmkindik bar.
