Atyraýdaǵy Azǵyr aýyldyq okrýginde polıtsııa bólimi ashyldy
ATYRAÝ. QazAqparat - Reseımen shekaralas jatqan Atyraý oblysynyń Qurmanǵazy aýdanyndaǵy Azǵyr aýyldyq okrýginde jańa polıtsııa bólimi ashyldy, dep habarlaıdy QazAqparat tilshisi ishki ister departamentiniń baspasóz ortalyǵyna silteme jasap.
Tártip saqshylary buryn Azǵyr óńirine aýdan ortalyǵynan at aryltyp, 300 shaqyrymnan qatynasa, qazir aýylda otyryp, tártipti kúsheıtýge múmkindik bar.
Polıtsııa bóliminiń ashylý saltanatyna kelgen aýdan ákiminiń orynbasary Jastilek Hasanov 7000-ǵa jýyq turǵyny bar shalǵaı óńirde quqyqbuzýshylyq pen qylmystyń aldyn alý baǵytyndaǵy jumystardy jedeldetý ózekti másele bolǵanyn aıtty. Jańa bólimniń ashylýymen quttyqtap, jergilikti atqarýshy organdardyń tarapynan polıtsııa qyzmetin qoldaý jalǵasatynyn jetkizdi.
Atyraý oblystyq ishki ister departamenti bastyǵynyń orynbasary polıtsııa polkovnıgi Sultan Moldashev quqyq qorǵaý organdarynyń qyzmet nátıjesine toqtalyp, oblysta tirkelgen qylmys sany tómendegenin aıtty.
QR ІІM keshendi josparyna saı, jergilikti ákimdikterdiń qoldaýymen, oblystyń ár túkpiri, ásirese, shalǵaı aýyldardy polıtsııanyń jiti baqylaýyna alýǵa baǵyttalǵan jumys júrgizilýde. Zamanaýı quraldardyń kómegimen aýdandardaǵy ár polıtsııa bólimindegi kezekshi qyzmetin ІІD-niń jedel saraptamalyq pýltine qosý jumystary júrgizilýde.
«Bul qylmystyń izi sýymaı ashylýyna múmkindik beredi jáne barlyq qyzmetter jedel áreket etedi» dedi departament bastyǵynyń orynbasary.
Ol sondaı-aq 58000 turǵyny bar Qurmanǵazy aýdanynda byltyr 15 qylmys tirkelip, 11-i ashylǵanyn aıtty. Kúrmeýi qıyn, izin sýytpaı ashý qıynǵa soǵatyn qylmystar kóbine shalǵaıda bolady.
Súıindik, Balqudyq, Azǵyr, Asan, Úshtaǵan aýylyna qyzmet kórsetetin Azǵyr polıtsııa bólimin de 17 shtattyq birlik qaralǵan.
Aıta ketý kerek, 2016-2017 jyldary Qyzylqoǵa jáne Isataı aýdanynda shalǵaı eldi mekenderinde ashylǵan polıtsııa bólimsheleri ómirsheńdigin dáleldep, qylmyspen kúreste nátıjeli jumys atqaryp keledi.
