Atyraýdaǵy az qamtylǵan otbasynan shyqqan 40 bala Italııada demalady
ATYRAÝ. QazAqparat - Balalardyń shetelge baryp, demalýlary úshin qajetti joldamany Atyraý oblysynyń bilim basqarmasy qamtamasyz etýde, dep habarlaıdy Atyraý oblystyq Óńirlik kommýnıkatsııalar qyzmeti.
Búgin, 16-maýsymda, Atyraý qalasynyń halyqaralyq áýejaıynan 40 jetim jáne ata-anasynyń qamqorlyǵynsyz qalǵan balalar Italııanyń Chezenatıko qalasynda ornalasqan jazǵy demalys ornyna attandy. Balalardy qamqorshylary men dostary shyǵaryp saldy.
Italııadaǵy eki aptalyq demalysqa oblystyq bilim berý basqarmasy qarajat bólgen.
«Shańyraq» otbasylyq tıptegi balalar aýylynyń tárbıelenýshilerine 7 bılet berildi; 32 joldama qalalyq jáne aýdandyq bilim berý bólimderiniń qamqorshy jáne qamqorlyqtaǵy balalaryna, sondaı-aq, patronattyq tərbıedegi balalarǵa, 1 joldama №4 oblystyq sanatorlyq-ınternatynyń tárbıelenýshisine berildi.
Balalardy Atyraý qalasyndaǵy №12 orta mekteptiń muǵalimderi, daryndy balalarǵa arnalǵan oblystyq mektep-ınternatynyń ustazdary, sondaı-aq aǵylshyn tilin jetik meńgergen aǵa oqytýshylar jetekshilik etip barady.
Men úshin bıylǵy jazǵy demalysymnyń óte qyzyqty bolatynyna óte qýanyshtymyn. Bul saparda jańa dostar tabamyn, aǵylshyn tilin tereńirek meńgerip, sáýlet eskertkishterin kóretin bolamyn. Italııadaǵy umytylmas jáne ádemi oryndardy kóremin. Sapardan alǵan áserim men úshin ómir boıy esimde qalatyn bolady,- deıdi № 12 orta mekteptiń oqýshysy Əsemaı Nurjigitova.
Balalar «Adjıp Karachaganak B.V.» kompanııasynyń áleýmettik jaýapkershiligine baılanysty sheteldik lagerde demalýǵa múmkindikter aldy. Italııada jazǵy demalys kúnderi 3 shildege deıin jalǵasady.
