Atyraýdaǵy atys: Aýrýhanaǵa túsken jigit komada jatyr
ATYRAÝ. QazAqparat – Atyraýdaǵy atystan jaraqat alyp, aýrýhanaǵa túsken jigitke operatsııa jasaldy. Biraq, naýqas áli esin jıǵan joq, komada jatyr, dep habarlaıdy QazAqparat.
Buǵan deıin Atyraýda atystan úsh adam mert bolyp, bireýi aýrýhanaǵa túskenin , kúdiktiniń qamaýǵa alynǵanyn jazǵan bolatynbyz.
Oblystyq polıtsııa departamenti baspasóz qyzmetiniń aqparatyna súıensek, atys keshe, 15 naýryzda saǵat 22:10 shamasynda bolǵan. Atyraý qalasynyń «Avangard-3» shaǵynaýdanyndaǵy aıaldamada tapanshadan atylǵan oqtan 27 jáne 23 jastaǵy eki jigit qaza tapqan. Keıinnen 27 jastaǵy taǵy bir jigittiń mert bolǵany anyqtaldy.
Al, saǵat 22:50-de oblystyq aýrýhanaǵa1995 jylǵy azamat aýyr jaǵdaıda túsken.
«Ol – Atyraý qalasynyń mańyndaǵy Erkinqala eldi mekeniniń turǵyny. Oqtan naýqastyń bas súıeginiń sol jaq bóligi, mıy jaraqattanǵan. Bet súıegi jyrylǵan. Dárigerler naýqastyń basyna ota jasady. Naýqastyń otadan keıingi jaǵdaıy áli aýyr. Áli komada jatyr. Qazir oblystyq aýrýhananyń jansaqtaý bólimshesinde dárigerlerdiń jiti qadaǵalaýyna alyndy», -dep habarlady oblystyq densaýlyq saqtaý basqarmasynyń baspasóz qyzmeti.
