Atyraýdaǵy Aqkól aýyly karantınge jabyldy
ATYRAÝ. QazAqparat – Atyraý oblysynyń Qurmanǵazy aýdanyndaǵy Aqkól aýyldyq okrýgi aýmaǵynda karantın engizildi, dep habarlaıdy QazAqparat.
Bul týraly Qurmanǵazy aýdanynyń bas memlekettik sanıtarlyq dárigeri Karl Otarov
arnaıy qaýlyǵa qol qoıǵan. Qaýlyda aıtylǵandaı, Aqkól aýyldyq okrýginde 18 adamnan
koronavırýs ınfektsııasy anyqtalyp, 1 adamnyń qaýipti indetten qaıtys bolǵan.
Osyǵan baılanysty qaýlyǵa sáıkes, Aqkól aýyldyq okrýgindegi karantındik sharalar 18
maýsym tańǵy saǵat 07:00-ge deıin jalǵasady.
«Aqkól aýyldyq okrýgi aýmaǵyna kirýge jáne odan shyǵýǵa tyıym salynady, turǵylyqty
jerinde saǵat 06.00-22.00-ge deıin júrýine ruqsat etilsin. Basqa eldi mekenderdiń
turǵyndaryna Aqkól aýyldyq okrýgi aýmaǵyna kirýge qatań tyıym salynsyn.
Temirjol stansasyna kelip toqtaǵan poıyz vagondarynyń esikteri ashylmasyn,
adamdarǵa túsýge jáne minýge qatań tyıym salynsyn. Reseı Federatsııasy aýmaǵynda jumys
isteıtin qyzmetkerlerge mekeme basshylary 15 kúnge vahtalyq ádispen jumys jasaýdy
uıymdastyrsyn. 15 kúndik jumystan kelgen qyzmetkerler 14 kúnge úı karantınine
alynsyn», delingen qujatta.
Eske sala ketelik, buǵan deıin Atyraýda koronavırýstan kóz jumǵan naýqastyń úıinde bir
apta jatyp qalǵanyn, keıin úshinshi adamnyń qaıtys bolǵanyn habarlap edik. Sondaı-aq,
keshe karantınge baılanysty jalǵan aqparat taraǵan edi.
