Atyraýdaǵy 91 metrlik týtuǵyr túnde jaryqtandyrylady
ATYRAÝ. QazAqparat - Atyraý oblysynyń ákimi qaıta qalpyna keltirilip jatqan Isataı-Mahambet alańyna jáne týtuǵyr qurylysyna bardy, dep xabarlaıdy QazAqparat tilshisi.
Aımaq basshysy bıyl jazda bastalǵan alańdy qalpyna keltirý jumysynyń barysyn tekserdi. Qazir merdiger mekeme jerdi daıyndaý jáne beton quıý jumysyn aıaqtaýda. Drenaj júıesi tolyǵymen aýystyryldy, sý qubyry ornatylyp, jańa sýburqaqtarǵa alań daıyndaldy. Alańdaǵy jasyl jelekterdiń barlyǵy Talqaırań kentiniń aýmaǵyna kóshirildi.
Ortalyq alańdy qalpyna keltirý barysyn qaraǵan Nurlan Noǵaev merdigerlerge alań aýmaǵyn kógaldandyrýǵa nazar aýdarýdy tapsyrdy.
«Alańdy qalpyna keltirgennen keıin jasyl alqapqa aınaldyrý kerek, adamdar terekterdiń saıalarynda demalýlary úshin jasyl jelek sanyn kóbeıtý qajet. Sondaı-aq, oryndyqtar jetkilikti bolýy, qoǵamdyq dárethana sekildi qajettilikter bolýy tıis», - dedi merdiger mekemelerge Atyraý oblysynyń ákimi.
Jobalaý-smetalyq qujattamaǵa sáıkes belgilengen aýmaqqa eki kólemdi sáýlet kompozıtsııasy, úlken jáne shaǵyn sýburqaqtar, basseın, oryndyqtary bar pergolalar ornatylady. Alańnyń basty kórnekiligi kóbikti sýburqaq qondyrylǵan basseıni bar mármár dombyra túrindegi sáýlet kompozıtsııasy bolady dep josparlanyp otyr.
Oblys ákimi bıiktigi 91 metr bolatyn týtuǵyr qurylysymen de tanysty. Ol Qulmanov pen Jangeldın kósheleriniń qıylysyndaǵy jańa alańǵa ornatylady.
Nysannyń alańy 57 sharshy metr, týtuǵyr bıiktigi 91 m. 112 sharshy metr jańa alańǵa ornatylǵan 91 metr bıiktiktegi memlekettik tý oblys ortalyǵynyń kez kelgen núktesinen anyq kórinetin bolady. Jobada qurylystyń eki jaǵynda ornalasatyn eki sýburqaq qarastyrylǵan.
«Osy nysanǵa baılanysty usynysym bar. Jańa alańǵa qazirgi zamanǵy eń jaqsy jaryqtandyrý ornatylsa, týtuǵyr qarańǵy túnde de alystan kórinip turar edi», -dedi Nurlan Noǵaev merdiger mekeme basshylyǵyna.
Óz kezeginde ortalyq alań men týtuǵyr qurylysyn qarjylandyryp otyrǵan «TShO» JShS basshylyǵy nysandar ýaqytynda jáne sapaly túrde tapsyrylýy úshin barlyq múmkindik jasalatynyna ýáde berdi.
Aıta keteıik, týtuǵyr Atyraýdaǵy eń bıik qurylys bolady jáne jergilikti kórneki jerler qataryna enedi dep kútilýde.
Atyraýdaǵy jańa alań memleketke qaıtarylǵan, paıdalanylmaǵan jer ýchaskesine salynǵan. 
