Atyraýdaǵy 60 eldi mekenniń 4,5 myń oqýshysyn arnaıy avtobýs tasymaldaıdy
Atyraý oblystyq bilim basqarmasy basshysynyń orynbasary Oryntaı Bımanovanyń aıtýynsha, saladaǵy 422 mekeme 9 923 beınekameramen qamtylǵan.
«Onyń ishinde 1481 polıtsııanyń jedel basqarý ortalyǵyna qosyldy. Bilim berý mekemelerinde «Jolda júrý erejeleri» oqytylady. Óńirdegi 60 eldi mekennen 4 myń 561 oqýshyny 49 avtobýs arqyly tegin tasymaldaıdy», -dep habarlady Oryntaı Bımanova.
Onyń aıtýyna qaraǵanda, balalardyń joldaǵy qaýipsizdigin saqtaý maqsatynda Atyraý qalasyndaǵy 6 mekteptiń tusyna «Sergek» qurylǵysy ornatylǵan. Sondaı-aq, mektepter pen balabaqshalardyń, basqa da oqý oryndaryna taıaý ornalasqan jaıaý júrginshiler jolaǵynyń tańbalary men jol belgileri, jasandy jol kedergilerine qaıta jańyrtý jumystary júrip jatyr.
Eske sala ketelik, buǵan deıin Atyraýda oqýshylardy tasymaldaıtyn 23 avtobýs satyp alýǵa 1,1 mlrd teńge bólingenin jazǵan edik.
Atyraý oblysynyń ákimi Serik Shápkenovtiń málimetinshe, bıyl bilim ordalarynyń materıaldyq-tehnıkalyq bazasyn nyǵaıtýǵa 4 mlrd 544 mln 527 myń teńge bólingen.
«Ótken jyly oqýshylardy 49 avtokólik tegin tasymaldady. Endi jańa oqý jylynda 60 eldi mekendegi 4 561 oqýshyny tasymaldaý josparlanyp otyr. Qosymsha 23 avtobýs satyp alý úshin 1,1 mlrd teńge bólindi. Kólikter qyrkúıek aıynda oqýshylardy tasymaldaýdy bastaıdy. Oqýlyq jáne oqý-ádistemelik keshendermen qamtý úshin 1 676 370,0 myń teńge qaraldy», -deıdi Serik Shápkenov.
