Atyraýda jylýdyń baǵasy 22,5 paıyzǵa ósti

ATYRAÝ. QazAqparat – Atyraýda jylýmen qamtý qyzmetiniń tarıfi 22,5 paıyzǵa ósti, dep habarlaıdy QazAqparat.

Tabıǵı monopolııalardy retteý komıteti Atyraý oblysy boıynsha departamenti baspasóz qyzmetiniń málimetinshe, «Atyraý jylý júıeleri» AQ jylý energııasyn bólý jáne taratý jónindegi rettelip kórsetiletin qyzmet tarıfin bekitý úshin ótinim túsken.

Buǵan deıingi tarıf 1 Gkal úshin qosymsha qun salyǵynsyz 6 048 teńge edi.

«Ótinim berýdiń negizgi sebebi – ınvestıtsııalyq baǵdarlamanyń ózgerýi jáne qyzmetkerlerdiń ortasha aılyq jalaqysyn ósirý. «Atyraý jylý júıeleri» AQ usynǵan jobada tarıfti 1 Gkal úshin qosymsha qun salyǵynsyz 9 720,45 teńgege ósirý usynyldy. Bul buryn bekitilgen tarıften 3 672,5 teńgege, nemese 60,7 paıyzǵa artyq. Departament mamandary monopolıst sýbektiniń ótinimin muqııat taldap, tarıfti 1 Gkal úshin qosymsha qun salyǵynsyz 7406,53 teńge mólsherinde bekitý jóninde sheshim qabyldady. Jańa baǵanyń ósimi bekitilgen tarıften 1358,53 teńgeni nemese 22,5 paıyzdy quraıdy», -dep habarlady óńirlik departamenttiń baspasóz qyzmeti.

Belgili bolǵandaı, 2023 jylǵa arnalǵan bekitilgen tarıf sheńberinde Atyraý oblysy energetıka jáne turǵyn úı-kommýnaldyq sharýashylyq basqarmasymen birlesip ınvestıtsııalyq baǵdarlamaǵa ózgeris engizilgen.

Investıtsııalyq baǵdarlama jylýmen jabdyqtaý salasyndaǵy tozý men apatty jaǵdaıdy tómendetýge, qyzmetterdiń sapasy men senimdiligin arttyrýǵa, sondaı-aq óndiristik personaldyń jalaqysyn 1 maýsymnan bastap 105,7%-ǵa arttyrýǵa baǵyttalǵan is-sharalardy kózdeıdi.

Eske sala ketelik, buǵan deıinAtyraý oblysynda elektr qýatynyń tarıfi 12,17 paıyzǵa óskenin jazǵan bolatynbyz.