Atyraýda jylý jelisiniń jartysynan astamy tozǵan
Oblystyq energetıka jáne turǵyn úı-kommýnaldyq sharýashylyq basqarmasy basshysynyń orynbasary Serikqalı Qanapınniń deregine súıensek, oblystaǵy jelilerdiń jartysynan astamy tozǵan.
«Atyraý oblysynyń aýmaǵynda 567,7 shaqyrym jylý júıesi bar. Jylý jelileriniń tozý deńgeıi 58,7 paıyzdy qurap otyr. Al, 14 352 shaqyrym elektr jelileriniń tozý deńgeıi 40 paıyzǵa jetken. Sýmen jabdyqtaıtyn 4 263 shaqyrym qubyrdyń 29 paıyzy tozǵan. Atalǵan máseleni sheshý úshin Tabıǵı monopolııalardy retteý komıtetiniń usynysy arqyly ınvestıtsııalyq baǵdarlamalar sheńberinde jumystar júrgizilip jatyr», -dep málim etti Serikqalı Qanapın.
Tabıǵı monopolııalardy retteý komıteti Atyraý oblysy boıynsha departamentiniń basshysy Álibek Tóleptiń aıtýynsha, Memleket basshysynyń Joldaýyn iske asyrý sheńberinde «Tarıfti ınvestıtsııaǵa aýyrbastaý» jobasy iske asyrylady.
«Bul jobany iske asyrýdyń negizgi maqsaty – óńirdegi elektr qýatymen qamtamasyz etý jáne sý qubyry jelileriniń, jylý kommýnıkatsııasynyń tozý deńgeıin tómendetýge qol jetkizý. Ótken jyldyń jeltoqsan aıynda atalǵan tapsyrma boıynsha jańa zańǵa qol qoıylyp, kúshine endi. Atalǵan zań aıasynda birneshe problemany oń sheshý kózdelgen. Eń bastysy – óńirdegi monopolıst kompanııalardyń quzyryndaǵy jelilerdiń tozý deńgeıin tómendetý. Bul úshin aldymen monopolıst kompanııalardyń ınvestıtsııalyq baǵdarlamalaryn ulǵaıtý kerek. Jelilerdiń eskirýi – bir kúnde paıda bolǵan másele emes. Al, ony tómendetý de bir jylda aıaqtalmaıtyny anyq. Sondyqtan, qazirgi maqsatymyz – monopolıst kompanııalarǵa tıesili jelilerdiń tozý deńgeıin 15%-ǵa deıin tómendetý. Bul jumys kezeń-kezeńimen iske asatyn bolady», -deıdi Álibek Tólep.
Eske sala ketelik, Atyraýda apat joıylyp, barlyq úıge jylý berilgenin jazǵan edik.