Atyraýda jylý jelileriniń 68 paıyzy tozyp tur
Oblystyq energetıka jáne turǵyn úı-kommýnaldyq sharýashylyǵy basqarmasynyń basshysy Aıdýlat Kenjebekovtiń aıtýynsha, bıylǵy 12 qazanda «Atyraý jylý-elektr ortalyǵy» AQ-da qýaty 100 MVt quraıtyn №12 týrboagregat jumysy toqtatylǵan.
«Bul týrboagregat 2020 jyly kúrdeli jóndeýden ótkizilgen. Alaıda, endi ony qalpyna keltirý jumysyn 2023 jyldyń 30 qańtaryna deıin aıaqtaý josparlanyp otyr. Jalpy stansanyń belgilengen elektr qýaty - 474 MVt. Al, qazirgi jaǵdaıy boıynsha naqty óndirilgen kólem – 186 MVt. Stansanyń negizgi qondyrǵylarynda júrgizilip jatqan jóndeý jumystary ýaqytyly aıaqtalmasa, jylytý maýsymynyń turaqty ótýine qaýip tóný yqtımaldyǵy joǵarylaıdy. «AtyraýJylýJúıeleri» AQ menshiginde tozý deńgeıi 68% quraıtyn 426,7 shaqyrym jylý jelisi bar. Investıtsııalyq baǵdarlama aıasynda jyl saıyn 13-20 shaqyrymdaı jelige jóndeý júrgiziledi. Biraq, bul 50 jyldan beri qalyptasqan jylý jelileriniń tozý deńgeıin azaıtpaı otyr. Bul jelilerdi tolyqtaı jóndeýden ótkizý úshin jyl saıyn 70 shaqyrymdaı jylý jelisin aýystyrý qajet», -dedi Aıdýlat Kenjebekov.
Oblys ákimi Serik Shápkenovtiń aıtýyna qaraǵanda, atalǵan basqarma qańtar aıyna deıin jylytý maýsymyndaǵy máselelerdi sheshý úshin arnaıy baǵdarlama daıyndaýy qajet.
«Óıtkeni bizge jeke jylý qazandyqtary bar turǵyn úı keshenderiniń turǵyndarynan aryz-shaǵym kóp túsedi. Turǵyndar úıdiń salqyndyǵyn aıtyp, bazynasyn jetkizedi. Osy rette bizde «bólip alý» degen qaǵıda bolmaýy kerek. «Mynaǵan páter ıeleri kooperatıvi, basqasyna «Atyraý-Jaryq» AQ, ne «AtyraýJylýJúıeleri» AQ, jeke jylý qazandyqtary bary óz aldyna jaýap beredi» dep bólýge bolmaıdy. Turǵyndardyń aryz-shaǵymy bárine ortaq. Olardyń tıisti deńgeıde sapaly qyzmet alýǵa quqyǵy bar. Ony biz qamtamasyz etýimiz qajet. Qazir eń birinshi kezektegi másele – jedel túrde jylytý maýsymynyń qıyndyqsyz ótýin qamtamasyz etý», -dedi Serik Shápkenov.
Eske sala ketelik, budan buryn Atyraýda tozyǵy jetken jylý qazandyqtary jańartylatynyn habarlaǵan edik.
