Atyraýda jylý maýsymyna 6,3 mlrd teńge bólingen
ATYRAÝ. QazAqparat –Atyraý oblysynda 2020-2021 jylǵy berý maýsymyna daıyndyqqa 6,3 mlrd teńge bólingen, dep habarlaıdy QazAqparat.
Oblystyq energetıka jáne turǵyn úı-kommýnaldyq sharýashylyǵy basqarmasynyń basshysy Baýyrjan Tuhfatovtyń málimetinshe, 3,6 mlrd teńge jergilikti bıýdjetten, qalǵany 2,7 mlrd teńgesi kásiporyndar esebinen qarastyrylǵan.
«Kópqabatty turǵyn úılerdiń 98 paıyzy, al bilim berý, medıtsınalyq uıymdar nysandary tolyqtaı gıdravlıkalyq synaqtan ótti. Budan bólek, uzyndyǵy 782,8 shaqyrym bolatyn elektr, 3,08 shaqyrymdyq sý men káriz jelileriniń, sondaı-aq, 20 shaqyrymǵa jýyq jylý jelisi túgeldeı jóndeýden ótti» – dedi B.Tuhfatov.
Basqarma basshysynyń aıtýynsha, «Nursaıa» yqsham aýdanyndaǵy uzyndyǵy 3 shaqyrymnan astam magıstraldy jylý qubyryna jóndeý jumystary jasalǵan.
Biraq bul baǵytta sheshimin tappaǵan máseleler áli de bar. Atyraý oblysynyń ákimi Mahambet Dosmuhambetov turalap qalǵan jumystardy qaıta jandandyryp, jedel sheshý baǵytynda tıisti organdarǵa birqatar tapsyrma júktedi.
«Oblysta kópqabatty turǵyn úılerge jylytý qazandyqtaryn ornatýda talaptarǵa sáıkes kelmeıtin jaǵdaılar kezdesedi. Osy máselege naqty taldaý júrgizilýi qajet. Sonymen qatar, aımaqta tabıǵı gaz tutyný boıynsha 15 mln teńge kóleminde debıtorlyq bereshek bar. Ony óteý úshin naqty jospar jasalýy tıis. Al, Atyraý qalasy men aýdan ákimderine jylý berý maýsymyna bólingen qarajattyń zań sheńberinde ıgerilýin qamtamasyz etýdi tapsyramyn. Oblys ortalyǵyndaǵy 31,5 shaqyrym ıesiz jylý jelisi men «Balyqshy», «Bereke», «Nursaıa» shaǵyn aýdandaryn teńgerimge berý jumystary uıymdastyrylýy kerek», – dedi Mahambet Dosmuhambetov.
