Atyraýda jylý berý nelikten toqtatylǵany belgili boldy
ATYRAÝ. QazAqparat - Atyraý qalasynyń jylý jelisindegi aqaýdy jóndeý jumystary júrgizilýde, dep habarlaıdy QazAqparat qala ákimdiginiń Feısbýktegi paraqshasyna silteme jasap.
Bul týraly «Atyraý JEO» AQ prezıdenti Aıbar Rahmanov málim etti. Onyń aıtýynsha, 19 qańtarda saǵat 19:00-der shamasynda jylý jelisi óshirilgen.
«Atyraý jylý-elektr ortalyǵynan shyǵatyn eki magıstraldy jeliniń birinde tesik paıda boldy (sý ketip jatyr). Osy ýchaskeni óshirý úshin jylý jelilerin toqtatýǵa týra keldi», - deıdi Aıbar Rahmanov.
Qazirgi ýaqytta aqaýy bar ýchaske óshirilgen, JEO jumysshylary jylý jelilerin qaıta iske qosýmen aınalysýda.
«Atyraý turǵyndarynyń úılerine jylý bir saǵattyń ishinde beriledi», - dep ýáde berdi Aıbar Rahmanov.
Eske salsaq, buǵan deıin JEO-daǵy apat saldarynan Atyraý jylýsyz jáne ystyq sýsyz qalǵanyn habarlaǵan bolatynbyz.
