Atyraýda jylý batareıalaryn urlaǵan azamat qylmystyq jaýapkershilikten bosatyldy
ATYRAÝ. QazAqparat - Atyraýda jylý batareıalaryn urlaǵan azamat qylmystyq jaýapkershilikten bosatyldy, dep habarlaıdy QazAqparat tilshisi.
Atyraý qalasynyń №2 sotynda Qazaqstan Respýblıkasynyń QK-niń 187-babynyń 1-bóligimen B.-ǵa qatysty qylmystyq is qaraldy.
Sottalýshy B. 2018 jyldyń qyrkúıek aıynda Atyraý qalasy Balyqshy poselkesinde ornalasqan úı podeziniń tórtinshi qabatyna uıyqtaý maqsatynda kóterilgen. Sol jerdegi jylý batareıasynyń qoljetimdi jerde turǵanyn jáne ońaı aǵytylatynyn kórgen soń, jymqyryp, oqıǵa bolǵan jerden boı tasalap, qashyp ketken. Nátıjesinde sottalýshy B. jábirlenýshi «Qaladaǵy turǵyn úılerge kommýnaldyq qyzmet kórsetý» JShS-ne 16 200 teńge kóleminde materıaldyq zalal keltirgen. Sot otyrysynda sottalýshy B. kinásin moıyndap, is-árekettine ókinish bildirip, keshirim surap, keltirilgen zııannyń tolyqtaı ótelgenin aıtyp, qylmystyq isti toqtatýdy surady», - dep habarlady Atyraý qalasynyń №2 sotynyń baspasóz qyzmetinen.
Sotta jábirlenýshi ókili ózara tatýlasýlaryna baılanysty B.-ǵa qatysty qylmystyq isti toqtatýdy surady.
Qazaqstan Respýblıkasynyń QK-niń 187-babynyń 1-bóligimen B.-ǵa qatysty qylmystyq is jábirlenýshi jaqpen tatýlasýyna baılanysty qysqartylyp, sottalýshy qylmystyq jaýapkershilikten bosatyldy.
