Atyraýda jylqyshynyń ólimine qatysy bar ekinshi kúdikti ustaldy
ATYRAÝ. QazAqparat – Atyraý oblysynda jylqyshynyń ólimine qatysy bar ekinshi kúdikti ustaldy, dep habarlaıdy QazAqparat tilshisi.
Buǵan deıin polıtsııa qyzmetkerleri Jylyoı aýdanynda jylqysyn izdeýge shyǵyp, iz-túzsiz joǵalyp ketken jylqyshynyń óli denesin tereń shuńqyrdan tapqan edi. Atalǵan derekke qatysty buryn sottalǵan 38 jastaǵy kúdikti ustalǵan bolatyn.
«Kúdiktige qatysty júrgizilgen tekserý kezinde 16-shy kalıbrli myltyq tárkilendi. Qazir QR Qylmystyq kodeksiniń 99-babymen (adam óltirý) sotqa deıingi tergeý júrgizilip jatyr. Birqatar saraptama taǵaıyndaldy. Polıtsııa qyzmetkerleriniń arnaıy jedel izdestirý sharalarynyń nátıjesinde taǵy bir kúdikti anyqtalyp, 1967 jyly týǵan jergilikti turǵyn ustaldy. Jedel-tergeý jumystary jalǵasýda» -dep habarlady oblystyq polıtsııa departamentiniń baspasóz qyzmeti.
Eske sala ketelik, budan buryn Atyraýda iz-túzsiz joǵalyp ketken jylqyshynyń denesi tereń shuńqyrdan tabylǵan edi. Osy qylmysqa qatysy bar degen kúdikpen Jylyoı aýdanynyń 38 jastaǵy turǵyny ustaldy .
