Atyraýda jylqy músinin syndyrǵan azamat qamaýǵa alyndy
ATYRAÝ. QazAqparat – Atyraýda jylqy músinin syndyrǵan azamat 5 táýlikke qamaldy, dep habarlaıdy QazAqparat.
Oblystyq Polıtsııa departamentiniń baspasóz qyzmetinen málim etkendeı, keshki saǵat 19:50 shamasynda 43 jastaǵy azamat mas kúıde jylqy músinin qulatqan.
«Polıtsııa qyzmetkerleri Sátbaev kóshesindegi jylqy músinin syndyrǵan Oral qalasynyń turǵynyn ustady. Medıtsınalyq saraptamanyń qorytyndysyna sáıkes, onyń orta dárejedegi mas kúıde ekeni anyqtaldy. Atalǵan azamatqa qatysty QR Ákimshilik quqyqbuzýshylyq týraly Kodeksiniń 434-babynyń 1-bólimimen (Usaq buzaqylyq), 440-babynyń 3-bólimimen (Alkogoldik ishimdikterdi ishý nemese qoǵamdyq oryndarǵa masań kúıde kelý, osy baptyń birinshi jáne ekinshi bólikterinde kózdelgen, ákimshilik jaza qoldanylǵannan keıin bir jyl ishinde qaıtalap jasaǵan áreketter) ákimshilik hattamalar toltyryldy», - dep habarlady departamenttiń baspasóz qyzmeti.
Sot sheshimimen 43 jastaǵy azamat 5 táýlikke ákimshilik qamaýǵa alyndy.
Eske sala ketelik, budan buryn Atyraý turǵyny úıiniń aýlasynda marıhýana ósirgenin
jazǵan bolatynbyz.
