Atyraýda jyldyń úzdik kásipkerleri anyqtaldy
ATYRAÝ. QazAqparat – Atyraý oblysynda jyldyń úzdik kásipkerleri anyqtaldy, dep habarlaıdy QazAqparat óńirlik kommýnıkatsııalar qyzmetine silteme jasap.
Atyraýda oblys ákiminiń orynbasary Álibek Náýtıev jyl qorytyndysymen anyqtalǵan úzdik kásipkerlerdi marapattady.
«Bıyl pandemııaǵa baılanysty túrli máseleler týyndady. Qıyndyqtar boldy. Ásirese, alǵashqy kezeńde aýrýhanalarda ókpeni jasandy jeldetý apparattary, basqa da qajetti quraldar, medıtsınalyq betperde, dári-dármek jetispedi. Sol kezde jergilikti kásipkerler kómek kórsetti», - dedi Álibek Náýtıev.
Oblys ákiminiń orynbasary óńirdegi kásipkerlikti damytýǵa úles qosyp júrgen 8 kásipkerge Atyraý oblysy ákiminiń alǵys hatyn tabys etti. Sondaı-aq, «Jyl kásipkeri 2020» baıqaýynyń jeńimpazdary anyqtaldy. «Bıznes jobanyń jańashyldyǵy» nomınatsııasyna Baqytjan Darıeva, Samal Jumasheva, Abzal Artyqbaev, «Jyl metsenaty 2020» nomınatsııasyna Áset Mámbetov, Bolat Boshanov, Tóken Jumaǵulov, «Jyl kásipkeri 2020» nomınatsııasyna Qanat Sydıhov, Marat Ómirzaqov ıe boldy. «Jyl kásipkeri 2020» nomınatsııasynyń jeńimpazy bolyp «Brando» JShS-niń quryltaıshysy Mahmýt Meralıev tanyldy.
«Jyl metsenaty 2020» atalymymen marapattalǵan «Trans – Oıl BB» JShS dırektory Bolat Býshanov jergilikti kásipkerlerdi kómek kórsetýge shaqyrdy.
«Qıyn kezeńde turǵyndarǵa kómek kórsetý – bárimizdiń paryzymyz. Sol sebepten, dárigerlerdi qonaq úı men ystyq tamaqpen qamtamasyz ettik. Elimiz tynysh, jurtymyz aman bolsa ǵana ekonomıka órkendeıdi. Osy oraıda kásipkerlerdi birigip kómek kórsetýge shaqyramyn», - dedi Bolat Boshanov.
Eske ala ketelik, budan buryn Atyraý oblysynda kásipkerlerdi qoldaýǵa 4,9 mord teńge bólingenin habarlaǵan bolatynbyz.
