Atyraýda jyl basynan beri júk kólikteriniń ıelerine 46 mln teńge aıyppul salynǵan
Atyraýda «Jol aktıvteriniń ulttyq sapa ortalyǵy» RMK Atyraý oblystyq fılıalynyń ınjeneri Meıirhan Bekesovtiń aıtýynsha, jol sapasynyń nasharlaýyna aýyr júk kólikteriniń belgilengen mólsherden áldeqaıda artyq júk tasymaldaýy áser etedi.
Máselen, «Atyraý-Inder» jolymen aýyr júk kólikteri jıi ótedi. Óıtkeni, Inder aýdanynyń aýmaǵynan alynatyn qurylys materıaldary Atyraý qalasyna osy jolmen tasymaldanady.
«Statıstıkalyq taldaý Atyraý oblysynda asfalttyń 35 paıyzy júk kólikterindegi aýyr salmaqtyń saldarynan tez tozatynyn kórsetip otyr. Sol sebepten, jol sapasyn saqtaý úshin jyldyń ár mezgilinde aýyr júk kólikterine baqylaý is-sharalary kúsheıtiledi. Erejege sáıkes aýyr júk kólikteriniń salmaǵy 8 tonnadan asqan jaǵdaıda aıyppul salynady», -deıdi Meıirhan Bekesov.
Jaqynda fılıal mamandary Atyraý oblysy boıynsha kóliktik baqylaý ınspektsııasy, oblystyq jolaýshylar kóligi jáne avtomobıl joldary basqarmasynyń ókilderimen birge júk kólikterine tekserý júrgizdi. Tekserý kezinde kólik baqylaý ınspektorlary birneshe júk kóligin toqtatyp, arnaıy qurylǵymen salmaǵyn ólshedi. Qum tıegen keıbir júk kólikteriniń salmaǵy shekti mólsherden 3-5 tonnaǵa asqany anyqtaldy.
«Kólik ıelerine QR Ákimshilik quqyq buzýshylyq týraly kodeksiniń 571-babynyń 6-bólimimen ákimshilik hattama toltyrylyp, aıyppul salyndy. Jyl basynan beri jol boıynda zań buzǵan 62 myńnan astam kólik ıelerine salynǵan aıyppul 46 mln teńgeni qurady», -deıdi Atyraý oblysy boıynsha kóliktik baqylaý ınspektsııasy bóliminiń mamany Talǵat Jantemirov.
Eske sala ketelik, buǵan deıin Atyraý oblysynda ekologııany búldirgender 270 mln teńge aıyppul tóleıtinin jazǵan edik.