Atyraýda jyl basynan beri jol-kólik oqıǵasynan 4 jasóspirim mert bolǵan
Oblystyq polıtsııa departamenti baspasóz qyzmetiniń málimetine súıensek, jyl basynan beri jol-kólik oqıǵasynan 30-dan astam jasóspirim túrli dene jaraqatyn alǵan.
«Atyraý oblysynyń aýmaǵynda balalardyń qatysýymen 20-dan astam jol-kólik oqıǵasy tirkeldi. Sonyń saldarynan 30-dan astam jasóspirim ár túrli dene jaraqatyn alyp, 4-eýi mert boldy. Ásirese, sońǵy kezde mundaı derek jıiledi. Sol sebepten, ata-analarǵa jazǵy demalys kezinde balalardy qaraýsyz qaldyrmaýdy eskertemiz. Júrgizýshilerden jolda júrý erejesin qatań saqtaý suralady», -dep málim etti departamenttiń baspasóz qyzmeti.
Jasóspirimderdi qaqqan kólik júrgizýshileriniń keıbiri oqıǵa ornynan qashyp ketetin jaıttar bar. Mundaı derek 5 maýsymda Isataı aýdanynyń Janbaı aýylynda tirkelgen. Munda 30 jastaǵy júrgizýshi 3 jasóspirimdi qaǵyp, oqıǵa ornynan qashyp ketken. Isataı aýdandyq polıtsııa bóliminiń qyzmetkerleri júrgizýshi ustady. Kólik arnaıy turaqqa qoıylǵan.
Eske sala ketelik, budan buryn Atyraýda KamAZ kóligi qaqqan 6 jasar bala mert bolǵanyn habarlaǵan edik.
Sondaı-aq, jantúrshigerlik jol apatynan keıin rýldegi jasóspirim aýrýhanaǵa tústi.
Al keshe, 5 maýsymda jeńil kólik qaqqan eki jasóspirim aýrýhanaǵa jetkizilgenin jazǵan bolatynbyz.
«Elektrli samokatpen kele jatqan 2 jasóspirimdi Toyota Verso avtokóligi qaǵyp ketti. Saldarynan 1 jasóspirim ártúrli dene jaraqatymen aýrýhanaǵa jatqyzyldy», -dep habarlady departamenttiń baspasóz qyzmeti.
