Atyraýda jyl basynan beri jol apatynan 53 adam mert bolǵan
Atyraý oblystyq prokýratýrasynyń málimetine súıensek, jyl basynan beri 116 jol-kólik oqıǵasy tirkelgen. Onyń ishinde 10 jol apatyna kináliler masań kúıinde bolǵan. Jol apatynan 53 adam qaza tapqan. Jantásilim etkenderdiń arasynda eki jasóspirim bar.
«Avtomobıl apattarynyń negizgi sebebi – jol qozǵalysy erejelerin saqtamaý. Sonyń saldarynan sońǵy eki jylda jol-kólik oqıǵasyna qatysty quqyq buzýshylyǵyn jasaǵany úshin sońǵy 60 júrgizýshi sottaldy. Onyń ishinde 35 adam 1 jyldan 7 jylǵa deıingi merzimderge bas bostandyǵynan aıyryldy. Sol sebepten, joldarda qozǵalys qaýipsizdigin qamtamasyz etý – ýákiletti tulǵalar men vedomstvolardyń ǵana jaýapkershiligi emes ekenin umytpaýymyz kerek. Bul – jol qozǵalysyna qatysýshylardyń basty mindeti», -deıdi oblys prokýrory Baýyrjan Jumaqanov.
Osyǵan oraı oblys prokýratýrasy júrgizýshilerdi jol qozǵalysy erejelerin múltiksiz saqtaýǵa, adamdardyń jaraqattanýy men ólimine jol bermeýge shaqyryp otyr.
«Jol-kólik oqıǵasynan bolatyn ólim jaǵdaıy júrgizýshiniń jaýapsyzdyǵynan ekenin túsiný qajet. Júrgizýshiler kólik quralyn qaýipsiz paıdalanýdy qamtamasyz etip, jol-kólik oqıǵasynan qaza tapqan árbir adamnyń artynda ata-anasy, jubaıy, balalary men jaqyndary qalatynyn umytpaýy tıis», -dep málim etti Baýyrjan Jumahanov.
Eske sala ketelik, buǵan deıin Atyraýda jedel járdem kóligi jol apatyna ushyraǵanyn habarlaǵan bolatynbyz.