Atyraýda jyl basynan beri mas kúıde rýlge otyrǵan 270 júrgizýshi ustaldy
Jergilikti polıtsııa qyzmeti basqarmasynyń bastyǵy, polıtsııa polkovnıgi Erlan Bıǵambaevtyń málimetinshe, Atyraý qalasynyń aýmaǵynda 70 jol-kólik oqıǵasy tirkelgen.
«Jol-kólik apatynyń saldarynan 4 adam qaza taýyp, 71 adam ártúrli dene jaraqatyn aldy. Al, jasóspirimderdiń qatysýymen 13 jol-kólik oqıǵasy tirkelip, 13 jasóspirim ártúrli dárejede zardap shekti. Atyraý qalalyq polıtsııa basqarmasy patrýldik polıtsııa batalonynyń qyzmetkerleri mas kúıde rýlge otyrǵan 270 júrgizýshini ustady. Mas júrgizýshiniń bári ákimshilik jaýapkershilikke tartyldy», -deıdi Erlan Bıǵambaev.
Onyń aıtýynsha, jol-kólik oqıǵasyna uryndyratyn birneshe sebep bar. Aldymen bul qarsy baǵyttaǵy jolaqqa shyǵýmen baılanysty bolyp otyr. Ekinshiden - jaıaý júrginshilerdi qaǵý, úshinshiden - jol qıylystarynan ótý erejesin buzý, tórtinshiden - jyldamdyqty shamadan tys asyrý. Besinshiden - mas kúıde rýlge otyrý.
«Atyraý oblysynda 6 aıda osyndaı sebepterden jol-kólik oqıǵasy - 21,4, qaza bolǵandar sany - 60, dene jaraqatyn alǵandar sany 11,8 paıyzǵa ósip otyr. Jol-kólik oqıǵasynan 40 adam qaza taýyp, 189 adam ártúrli dene jaraqatyn aldy. Oblys aýmaǵynda jyl basynan beri jyldamdyqty shamadan tys asyrǵan 153 myńnan, qarsy baǵytqa shyqqan 130-dan, jaıaý júrginshilerge jol bermegen 800-den, jaıaý júrginshilerge arnalǵan jolaqtan ótý kezinde 5 myńnan astam quqyq buzýshylyq deregi anyqtaldy», - dep málim etti Erlan Bıǵambaev.
Eske sala ketelik, budan buryn Atyraý oblysynda alty aıda jol apatynan 40 adam mert bolǵanyn jazǵan edik.