Atyraýda jyl basynan beri aıyppul tóleýden jaltarǵan 500-ge jýyq júrgizýshi ustaldy
Oblystyq polıtsııa departamenti baspasóz qyzmetiniń málimetinshe, 1-31 mamyr aralyǵynda tólenbegen aıyppuly bar 130-dan astam júrgizýshi anyqtalǵan.
«Jyl basynan beri jol erejesin buzǵany úshin salynǵan aıyppulyn tóleýden jaltaryp júrgen 500-ge jýyq júrgizýshiniń kóligi arnaýly turaqqa qoıyldy. Bul júrgizýshiler jyldamdyqty asyrmaý, jol belgisi talaptaryn oryndaý, baǵdarshamnyń tıym salynǵan túsinen ótý qaǵıdalaryn buzǵany úshin «Sergek» apparattyq-baǵdarlamalyq keshen kamerasyna túsip qalǵan», -dep habarlady departamenttiń baspasóz qyzmeti.
Máselen, patrýldik polıtsııa qyzmetkerleri 28 mamyr kúni saǵat 12:30 shamasynda Atyraý qalasyndaǵy Qurmanǵazy kóshesinde «Vaz-2110» markaly avtokóligin toqtatqan. Tekserý kezinde jeńil kóliktiń Reseı Federatsııasynda tirkeýde turǵany anyqtaldy.
Kólikti basqarǵan 53 jastaǵy júrgizýshisiniń 324 myń 695 teńgeni quraıtyn tólenbegen 21 aıyppuly bar ekeni belgili boldy. Jeńil kólik QR Ákimshilik quqyqbuzýshylyq týraly kodeksiniń 785-babyna sáıkes, arnaýly turaqqa qoıyldy.
Eske sala ketelik, budan buryn Atyraýda VIP nómir ıeleri bıýdjetke 31,5 mln teńge shyǵyn keltirgenin jazǵan edik.