Atyraýda jyl basynan beri 8 adam tez pisetin taǵamnan ýlanǵan

ATYRAÝ. QazAqparat – Atyraý oblysynda jyl basynan beri tez daıyndalatyn taǵamnan 8 adam ýlanǵan, dep habarlaıdy QazAqparat tilshisi.

Atyraý oblystyq sanıtarııalyq-epıdemıologııalyq baqylaý departamentiniń bas mamany Gúldana Bısenbaıdyń aıtýynsha, byltyr 3 adam astan ýlanǵan.

«Bıyl jyl basynan beri 8 astan ýlaný deregi tirkeldi. Sáýir aıynda Jylyoı aýdanynda ornalasqan Teńiz ken ornynyń vahtalyq kentindegi tez taǵam daıyndaıtyn dámhanadan 8 adam as ishken. Sodan keıin olardyń aǵzasyna astan ýlaný belgileri baıqalǵan. Osyǵan baılanysty dámhanaǵa tekserý júrgizildi. Tekserý kezinde tamaqtyń sanıtarııalyq talapqa saı emes sapasyz azyq-túlikten daıyndalǵany anyqtaldy», - dep habarlady Gúldana Bısenbaı.

Onyń aıtýyna qaraǵanda, qazir taǵamnan ýlanǵandar emdelip shyqqan. Olar jumysyna oralǵan.

«Sapasyz astan ýlanýdyń qaýpi joǵary ekenin eskerý kerek. Asqazanda túıilý, qusý, ish ótý belgisi baıqalsa, dereý dárigerge júgingen jón. Mundaı jaǵdaıda óz betimen emdelýge bolmaıdy. Osyndaı nemquraıly árekettiń sońy ólimge ákelip soqtyrýy múmkin. Sondyqtan tez pisetin taǵamdy tutyný kezinde óte saq bolǵan durys», -dep atap ótti Gúldana Bısenbaı.