Atyraýda jyl basynan beri 251 júrgizýshi kólik júrgizý quqyǵynan aıyryldy
ATYRAÝ. QazAqparat – Atyraýda jyl basynan beri joldyń qarsy baǵytyna shyqqan 251 júrgizýshi kólik júrgizý quqyǵynan aıyryldy, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetinshe, 5-11 jeltoqsan aralyǵynda «Quqyqtyq tártip» jedel profılaktıkalyq is-sharasy ótip jatyr.
«Іs-sharanyń maqsaty – jol qozǵalysy erejesin buzǵan, onyń ishinde kólik quraldaryn mas kúıinde basqarǵan júrgizýshilerdi anyqtaý, sondaı-aq qoǵamdyq oryndaǵy quqyq buzýshylyqtardyń aldyn alý, tıisti shara qoldaný. Osyǵan baılanysty áleýmettik jelide jol erejesin qasaqana buzǵan er adam týraly vıdeo tarǵan edi. Polıtsııa qyzmetkerleri «Vaz – 21144» avtokóliginiń rýlinde bolǵan 20 jastaǵy júrgizýshini anyqtady. Ol Atyraý qalasyndaǵy S.Beıbarys dańǵyly arqyly ótetin kópir ústinde solǵa burylý kezinde aq jolaqty kesip, joldyń qarsy bóligine shyqqan. Sóıtip, ózge kólikterge apattyq jaǵdaı týǵyzǵan», -deıdi patrýldik polıtsııa batalonynyń komandıri Nurlan Sársenbaev.
Onyń aıtýynsha, atalǵan júrgizýshige qatysty QR Ákimshilik quqyqbuzýshylyq týraly kodeksiniń 596-babynyń 3-bóligimen( Kólik quralyn joldyń júrý bóliginde ornalastyrý, qarsy júrip ótý nemese basyp ozý qaǵıdalaryn buzý) ákimshilik hattama toltyrylyp, 6 aı merzimge júrgizýshi quqyǵynan aıyrý maqsatynda jınaqtalǵan is-qujattar ákimshilik sotqa joldanyp otyr. Al, jyl basynan beri joldyń qarsy baǵytyna shyǵyp, quqyq buzýshylyq jasaǵan 251 júrgizýshi 6 aı merzimge kólik júrgizý quqyǵynan aıyrylǵan.
Eske sala ketelik, buǵan deıin Atyraý oblysynda 23 úıge urlyqqa túsken qylmystyq top músheleri sottalǵanyn habarlaǵan edik.
