Atyraýda jyl basynan beri 205 órt oqıǵasy tirkeldi
ATYRAÝ. QazAqparat – Atyraý oblysynda jyl basynan beri 205 órt oqıǵasy tirkelgen, dep habarlaıdy QazAqparat.
Oblystyq tótenshe jaǵdaılar departamenti memlekettik órt baqylaý basqarmasy bastyǵynyń mindetin atqarýshy Ǵabıt Babaevtyń aıtýynsha, órttiń basym kópshiligi turǵyn úı sektorynda oryn alǵan.
«Atyraýda jyl basynan beri 205 órt oqıǵasy tirkelip otyr. Onyń 86 órt turǵyn úılerde bolǵan. Bul – órttiń 42 paıyzy. Al, 52 ret avtokólik órtendi. Sondaı-aq, orman alqabynda 6 ret órt tutandy. Órttiń saldarynan 5 adam qaza taýyp, 3 adam ártúrli jaraqat aldy» -deıdi Ǵabıt Babaev.
Onyń málimetine súıensek, órttiń kóbeıýine elektr jelileriniń qysqasha tuıyqtalýy sebep bolǵan.
«Sońǵy kezde órt jıileýine elektr symdarynyń qysqasha tuıyqtalýy áser etip otyr. Bul eski kólikterde jıi kezdesedi. Óıtkeni, júrgizýshiler kóliginiń elektr symdaryn jıi tekserip turýdy eskermeıdi. Tipti órt sóndirý quraldaryna mán bermeıdi» -deıdi Ǵabıt Babaev.
Eske sala ketelik, buǵan deıin Atyraýda kólik jóndeý ortalyǵy órtenip ketkenin jazǵan bolatynbyz.
