Atyraýda jýrnalıster «Halyq alǵysy» medalimen marapattaldy
ATYRAÝ. QazAqparat – Atyraýda jýrnalıster «Halyq alǵysy» medalimen marapattaldy, dep habarlaıdy QazAqparat.
Qaýipti indetpen kúreske tartylǵan dárigerler men quqyq qorǵaý organdarynyń eńbegi týraly aqparat taratqan buqaralyq aqparat quraldarynyń ókilderi tynym tapqan joq. Jýrnalısterge marapatty oblys ákiminiń orynbasary Baqtygúl Hamenova tapsyrdy.
«Koronavırýs ınfektsııasymen kúreste dárigerler, tártip saqshylary, tótenshe jaǵdaı qyzmetiniń ókilderi janqııarlyq eńbektiń úlgisin kórsetti. Olardyń qyzmetin jan-jaqty kórsetýde buqaralyq aqparat quraldarynyń ókilderi erekshe kózge tústi. Kóptegen jýrnalıst qaýipti indetpen kúrestiń alǵy shebine, ıaǵnı, emdeý mekemelerine baryp, atqarylyp jatqan sharalar týraly reportajdar júrgizdi», - degen Baqtygúl Hamenova marapat ıelerin Atyraý oblysynyń ákimi Mahambet Dosmuhametovtiń atynan quttyqtady.
«Halyq alǵysy» medalimen marapattalǵandardyń arasynda «Atyraý-Aqparat» JShS dırektorynyń orynbasary Serik Qabdolov, «Habar24» arnasynyń Atyraý oblysyndaǵy menshikti tilshisi Álııa Jamıtova, Atr.kz saıtynyń bas redaktory Baıan Januzaqova, «Aqjaıyq» gazetiniń tilshisi Zúlfııa Iskalıeva, «Atameken bıznes» arnasynyń Atyraý oblysyndaǵy menshikti tilshisi Dınara Baǵytova, «Caspian NEWS» arnasynyń redaktory Karına Dýrjanova, Atyraý oblystyq kommýnıkatsııalar qyzmetiniń fototilshisi Rasýl Serikov, «Atyraý» telearnasynyń redaktory Juldyz Tileýhan men M.Ótemisuly atyndaǵy akademııalyq qazaq drama-tearynyń qoıýshy rejıssery Janat Teltaev bar.
Eske sala ketelik, budan buryn Atyraýda birqatar azamat «Halyq alǵysy» medalimen marapattalǵan edi.
