Atyraýda júrgizýshi kýáliginen aıyrylǵandar avtobýs aıdaǵan
Atyraý qalasynyń prokýrory Rýslan Aıtımovtyń aıtýynsha, jolaýshylar tasymaldaıtyn kásipkerlik sýbektilerdiń qyzmeti tekserilip jatyr. Tekserý polıtsııa qyzmetkerlerimen birge júrgizilgen.
«Atyraý qalasynyń prokýratýrasy jolaýshylar tasymaldaıtyn kásipkerlik sýbektilerdiń qyzmetine tekseris jumystaryn bastady. Onyń barysynda budan buryn masań kúıde kólikti basqaryp, kýáliginen aıyrylǵan adamdar qoǵamdyq kólikti júrgizgeni anyqtaldy. Osyǵan baılanysty qala turǵyndary men qoǵam belsendilerinen qoǵamdyq kólik marshrýtyna áser etetin zań buzýshylyqtar anyqtalǵan jaǵdaıda qala prokýratýrasynyń «WhatsApp» nómirine (+7 701 652-48-76) foto, vıdeo materıaldardy joldaýdy suraıdy», - dedi Rýslan Aıtımov áleýmettik jelidegi paraqshasynda.
Júrgizýshi polıtsııa basqarmasyna jetkizildi. Al qoǵamdyq kólik aıyp turaǵyna qoıyldy.
Eske salaıyq, buǵan deıin Atyraýda aıyppulyn tólemeı júrgen 134 boryshkerden 2 mln teńge óndirilgenin habarlaǵan edik.
Polıtsııa departamentiniń málimetinshe, 30 mamyrdan beri «Boryshker» jedel profılaktıkalyq is-sharasy ótkizilip jatyr.
