Atyraýda jumysshylarynyń jalaqysyn bermeı qoıǵan dırektor 3,5 jylǵa sottaldy

ATYRAÝ. QazAqparat – Atyraýda qyzmetkerler jalaqysyn alaıaqtyqpen ıemdengen dırektor 3,5 jylǵa sottaldy, dep habarlaıdy QazAqparat.

Atyraý kólik prokýrorynyń orynbasary Saıat Seıitjannyń málim etýinshe, «Kamal Krepost» JShS kólik salasyndaǵy nysandardy kúzetken 58 qyzmetkerine jalaqyny tolyq kólemde tólemeı kelgen.

«Atyraý kólik prokýratýrasyna túsken shaǵymnan keıin nysandardy kúzetýmen aınalysatyn seriktestikte 58 qyzmetkerdiń jalaqysy tolyq kólemde tólenbegen deregi anyqtaldy. Tekserý kezinde JShS dırektory Atyraý qalasynyń 58 turǵynyn jaldaǵan. Biraq, alaıaqtyq áreketke baryp, qyzmetkerlerdiń 9 mln teńgeden astam mólsherdegi jalaqysyn jymqyrǵany belgili boldy. Seriktestik dırektorynyń zańsyz áreketine qatysty prokýratýranyń aralasýymen QR Qylmystyq Kodeksiniń 190-babynyń 3-bóligimen (Eki jáne odan da kóp adamǵa qatysty jasalǵan alaıaqtyq) sotqa deıingi tergeý júrgizildi», -dep habarlady prokýrordyń orynbasary Saıat Seıitjan.

Onyń aıtýynsha, bul is Atyraý qalasyndaǵy № 2 sotta qaralǵan.

Sottyń úkimimen seriktestik dırektory qylmystyq quqyq buzýshylyq jasaǵany úshin kináli dep tanyldy.

Sot oǵan jábirlenýshilerge mindetti túrde zalaldy ótep, 3 jyl 6 aı merzimge bas bostandyǵynan aıyrý jazasyn taǵaıyndady.

Úkim zańdy kúshine endi.

Eske sala ketelik, buǵan deıin Atyraýda otyz adamǵa kredıt aldyryp, 40 mln teńgeni qaltasyna basqan alaıaq ustalǵanyn jazǵan bolatynbyz.

Sondaı-aq, Atyraý oblysynda 337 jumysshynyń 59 mln teńge jalaqy bereshegi ótelgenin habarlaǵan edik.