Atyraýda jumysshy quqyǵyn buzǵan 21 kásiporyn 4 mln teńge aıyppul tóledi
Atyraý oblystyq Memlekettik eńbek ınspektsııasy basqarmasynyń basshysy Igilik Áýbákirovtiń málimetinshe, bıylǵy úsh aıda azamattardan 487 ótinish túsken. Eńbek ınspektorlary 369 ótinishke baılanysty tekserý júrgizdi. Sonyń nátıjesinde 253 azamattyń eńbek qatynastary boıynsha konstıtýtsııalyq quqyǵy qorǵaldy.
«Bıylǵy jyl basynan basqarmada tirkelgen shaǵymdar men profılaktıkalyq baqylaý negizinde eńbek ınspektorlary 53 tekserý júrgizdi. Onyń qorytyndysynda eńbek zańnamasyn buzýdyń 52 deregi anyqtaldy. Soǵan sáıkes zańsyzdyqtardy joıý úshin 25 nusqama berilip, 21 ákimshilik hattama toltyryldy. Zań buzǵan 21 mekemege 4 mln teńge aıyppul salyndy», - dep habarlady Igilik Áýbákirov.
Onyń deregine súıensek, oblystaǵy óndiristik kásiporyndarda 9 jazataıym oqıǵa tirkelgen. Sonyń saldarynan 8 jumysshy aýyr dene jaraqatyn alǵan.
«Óndiristegi 4 jazataıym oqıǵa jumys berýshiniń kinásinen bolǵany dáleldendi. Al 2 oqıǵaǵa jumysshynyń ózi, 1 oqıǵaǵa jumys berýshi de, jumysshy da kináli ekeni anyqtaldy. Óndiristik jazataıym oqıǵalar boıynsha júrgizilgen arnaıy tergeý qujattary protsessýaldyq sheshim qabyldaý úshin quqyq qorǵaý organdaryna joldandy», -dep málim etti Igilik Áýbákirov.
Basqarma mamandary 395 adamǵa quqyqtyq maqsatta túsindirý jumystaryn júrgizgen.
Eske sala ketelik, buǵan deıin Atyraý oblysynda 337 jumysshynyń 59 mln teńge jalaqy bereshegi ótelgenin jazǵan bolatynbyz.
