Atyraýda jumys isteıtin 55 munaıshy Qostanaı oblysyna oralady
Oblys ákimdiginiń janynan qurylǵan jedel aqparat shtabynyń málimetine súıensek, bul shara Atyraý oblysyndaǵy koronavırýs indetiniń ósimine baılanysty týyndap otyr. Óńirge buǵan deıin 300-den astam munaıshy kelgen bolatyn.
«Búgin taǵy 55 vahtashy oralady. Olardyń barlyǵy – «Teńizshevroılda» jumys istep júrgen Qostanaı oblysynyń turǵyndary. Atalǵan azamattardan indet belgileriniń bar-joǵyn anyqtaý maqsatynda saýalnama alynyp, termometrııa júrgiziledi. Sodan soń olar ýaqytsha oqshaýlaý oryndaryna, oblys ortalyǵynyń karantın statsıonarlaryna jetkiziledi. Ol jerde COVID-19-ǵa tereń zertteý júrgizý úshin synama alynady. Zertteý qorytyndysy teris nátıje kórsetken jaǵdaıda, jazbasha qolhat alynyp, jumysshylar 14 kúndik ınkýbatsııalyq kezeń aıaqtalǵanǵa deıin úı karantınine jiberiledi», - dep habarlady oblystyq jedel aqparat shtaby.
Al taldaý qorytyndysy oń nátıje kórsetken jumysshylar ınfektsııalyq bólimge jatqyzylady.