Atyraýda jumyrtqa bir adamǵa 10 danadan ǵana satylyp jatyr
Atyraý oblystyq kásipkerlik jáne týrızm basqarmasynyń basshysy Nurbol Jańabekovtiń aıtýynsha, jumyrtqa saýdasyna qatysty mundaı shekteý alypsatarlyq áreket pen tapshylyqtyń aldyn alý úshin qolǵa alynǵan.
Aıtýynsha, birinshi sanattaǵy jumyrtqa áleýmettik mańyzy bar azyq-túlik taýarlarynyń tizimine kiredi. Sol sebepten, mundaı sanattaǵy ónim «aınalym shemasy» arqyly 38 saýda-sattyq núktesinde 35,6 teńgeden satylady.
«Alypsatarlyq áreketter men jumyrtqa tapshylyǵynyń aldyn alý maqsatynda «Ideal-market» saýda jelisinde bir qolǵa 10 jumyrtqadan aspaıtyn shekteý belgilendi. Basqa saýda oryndarynda mundaı shekteý joq», - dep málim etti Nurbol Jańabekov.
Sondaı-aq, óńir tutynýshylarynyń jumyrtqaǵa suranysyn qamtamasyz etý úshin ózge aımaqtardan ónim tasymaldaý jolǵa qoıylǵan.
«Atyraý oblysynda jumyrtqaǵa aılyq qajettilik – 7,9 mln dana. Óńirde jumyrtqa shyǵaratyn 2 iri kásiporyn jumys isteıdi. Bular – «Almaly qus» jáne «Baqaı qus» JShS. Eki kásiporynnyń bir aıdaǵy óndiristik qýattylyǵy – 2 mln dana jumyrtqa. Qazir eki kásiporyn oblys tutynýshylarynyń qajettiligin tek 30%-ǵa qamtamasyz etedi. Óńirdiń jumyrtqaǵa qajettiligin tolyq qamtamasyz etý úshin Qostanaı, Aqtóbe, Pavlodar jáne Batys Qazaqstan oblystarynan ónim tasymaldaý júzege asyrylyp otyr», - dep habarlady Nurbol Jańabekov.
Eske sala ketelik, budan buryn Atyraýda azyq-túlik baǵasyn turaqtandyrý úshin qaıtarylatyn qaryz berilgenin jazǵan bolatynbyz.
