Atyraýda juma kúni keshke 3 jetkinshek Jaıyq ózenine batyp ketti
ATYRAÝ. QazAqparat - Atyraýda juma kúni keshke 3 jetkinshek Jaıyq ózenine batyp ketti, dep habarlaıdy óńirdegi tilshimiz A. Sokolov.
Atyraý oblysy TJD sýdaǵy qutqarý stansasynyń aqparaty boıynsha, birinshi qaıǵyly oqıǵa qala mańyndaǵy Jumysker kentinde oryn aldy. Onda 9-synyp oqýshysy sýǵa batyp ketti. Balanyń múrdesi sýdan tabylyp, shyǵaryldy. Sodan birneshe mınýt óter-ótpesten qutqarýshylar dereý qala mańyndaǵy ózge bir kentke attanyp ketti. Onda eki 8-synyp oqýshysy sýǵa sekirip, sý betine shyqpaı qalǵan. Bul balalardyń da denesi sýdan tabylyp, shyǵaryldy. Bizdiń anyqtama. Atyraý oblysynda sońǵy kúnderi aptap ystyq bolyp tur. Búgin aýa temperatýrasy 36 gradýsqa deıin kóterildi. Ystyqtan balalar men jas jetkinshekter Jaıyq ózenine qaraı aǵylýda. Biraq sýǵa túsý maýsymy áli ashylǵan joq. Óıtkeni ózenge aǵyp jatqan sý tolastar emes, aǵys kúnnen kúnge kúsheıip barady. Mundaıda sýǵa túsý adam ómirine qaýip tóndiredi.
