Atyraýda júk poıyzy men KamAz soqtyǵysty
ATYRAÝ. QazAqparat - Atyraý oblysynda júk poıyzy KamAzben soqtyǵysty, dep habarlaıdy QazAqparat tilshisi.
«Oqıǵa 12 qyrkúıek kúni saǵat 14.32-de Atyraý oblysy Isataı aýdanyna qarasty Aqqystaý aýylynda bolǵan. Kólikter qorǵalmaıtyn rettelmeli ótpe joldyń 251-shi shaqyrymynda soqtyǵysty. Júk poıyzynyń quramy Atyraý-Astrahan baǵytymen jol júrip kele jatqan. Apattyń saldarynan KamAz avtokóliginiń 49 jastaǵy júrgizýshisi oqıǵa ornynan aýdandyq aýrýhanaǵa jatqyzyldy. 68 vagondyq júk poıyzy saǵat 15.10-da «Atyraý» stansasynan attanǵan almastyrýshy qosalqy teplovozdy kútý úshin Aqqystaý stansasyna súırep jetkizildi. Basqa poıyzdardyń qozǵalysy sol qalpy qaldy», - dedi Atyraý oblysy TJD-niń baspasóz qyzmeti.
Búgin avtomobıl júrgizýshisi sanıtarlyq avıatsııanyń tikushaǵymen Atyraý oblystyq aýrýhanasyna jetkizildi.
