Atyraýda jubaıy men qyzyna 1,1 mln teńgeni zańsyz aýdarǵan mádenıet úıiniń meńgerýshisi sottaldy
Sybaılas jemqorlyqqa qarsy is-qımyl agenttiginiń Atyraý oblystyq departamenti basshysynyń birinshi orynbasary Nurlan Jahınnyń aıtýynsha, mádenıet úıiniń meńgerýshisi 3,5 jylǵa sottalǵan.
«Jylyoı aýdanynyń Qosshaǵyl aýylyndaǵy mádenıet úıiniń meńgerýshisi óziniń qyzmettik jaǵdaıyn paıdalanýmen ushtasqan qylmystyq oıyn iske asyrǵan. Ol jubaıy men qyzyn resmı jumysqa ornalastyrǵan. Sóıtip, eńbekaqy tóleýge bólingen 1,1 mln teńgeden astam mólsherde zalal keltirdi. Jylyoı aýdandyq sotynyń úkimimen mádenıet úıiniń meńgerýshisi senip tapsyrylǵan bóten múlikti ıemdenip alý nemese talan-tarajǵa salý boıynsha qylmystyq quqyq buzýshylyq jasaǵany úshin 3 jyl 6 aıǵa bas bostandyǵynan aıyryldy. Sottalýshynyń kámeletke tolmaǵan balalarynyń bolýyna baılanysty jazasyn óteý 5 jylǵa keıinge qaldyryldy», -dep habarlady Nurlan Jahın.
Eske sala ketelik, budan buryn Atyraýda 6 mln teńgeni jymqyrǵan mektep dırektory sottalǵanyn habarlaǵan bolatynbyz.
Atyraý qalasyndaǵy M.Bekmuhambetov atyndaǵy orta mekteptiń dırektory 2018 jylǵy qyrkúıek pen 2021 jylǵy shilde aılary aralyǵynda qyzmetten bosaǵan jáne jumys jasap júrgen múǵalimderge tabel toltyrǵan. Sottalýshynyń is-áreketinen azamattardyń quqyqtary men zańdy múddeleri jáne mekteptiń qalypty jumysy buzylyp, 6 099 904 teńge kóleminde memlekettiń zańmen qorǵalǵan múddesine eleýli túrde zııan kelgen.
Sot sottalýshyǵa protsestik kelisimge saı, memlekettik qyzmette jáne uıymdarda laýazymdardy atqarý quqyǵynan ómir boıyna aıyryp, 3 jyl 6 aı merzimge bas bostandyǵyn shekteý jazasyn taǵaıyndady.
