Atyraýda jolaýshylar mingen «GAZeldiń» mas júrgizýshisi ustaldy
ATYRAÝ. QazAqparat - Atyraýda «Avtobýs» jedel-profılaktıkalyq is-sharasynyń bastalǵan alǵashqy kúninde jolaýshylar kóliginen 105 buzýshylyq anyqtalǵan. Sonyń ishinde, mas kúıinde jolaýshylar tasymaldaǵan «GAZel» júrgizýshisi ustaldy, dep habarlaıdy «QazAqparat» HAA tilshisi.
«Jedel-profılaktıkalyq is-sharalar barysynda rýlde otyryp telefonmen sóılesken, kólik quraldaryn zańsyz qaıta jabdyqtaǵan, ksenondyq shamdar ornatqan, reıske shyǵardan buryn teksermegen, jyldamdyq arttyrǵan, manevr jasaý erejesin buzǵandar jıi kezdesti. Bir kúnniń ishinde mundaı buzýshylyqtyń 105-i anyqtaldy», - dep málim etti ІІD baspasóz hatshysy Nazymgúl Qaısaǵalıeva.
Reıd barysynda mas kúıinde jolaýshylar tasymaldaǵan «GAZel» júrgizýshisi ustaldy. Oǵan qatysty QR Ákimshilik quqyq buzýshylyq kodeksiniń 608-baby boıynsha ákimshilik hattama toltyryldy.
Jedel-profılaktıkalyq is-sharalar 18 aqpanǵa deıin jalǵasady.
