Atyraýda jolaýshy tasymaldaýshylar Qurmanǵazynyń kúıin oryndady
ATYRAÝ. QazAqparat – Atyraýda jolaýshy tasymaldaýshylar Qurmanǵazynyń «Adaı» kúıin oryndady, dep habarlaıdy QazAqparat.
Budan buryn atyraýlyqtar Táýelsizdik kúninde qoǵamdyq kólikte tegin qatynap júrgenin jazǵan edik.
Atyraý qalalyq ákimdiginiń baspasóz qyzmetinen málim etkendeı, mundaı sheshim el Táýelsizdiginiń 30 jyldyǵyna oraı qabyldanǵan.
«Qala turǵyndary men qonaqtary 16 jáne 17 jeltoqsan kúnderi barlyq baǵytta qatynaıtyn qoǵamdyq kólikte tegin júredi. Jolaýshy tasymaldaý úshin kún saıyn 220 avtobýs marshrýtqa shyǵady. Eki kún boıy tegin júrý múmkindigin jas ereksheligine qaramastan barlyq jolaýshy paıdalana alady», -dep habarlady ákimdiktiń baspasóz qyzmeti.
Al, jolaýshy tasymaldaýshy kompanııalardyń qyzmetkerleri el Táýelsizdiginiń 30 jyldyǵyna erekshe syı jasady. «Atyraýavtopark» jáne «Alǵabýs» JShS-niń birlesýimen «Qazaǵymnyń qazynasy – qara dombyra» is-sharasyn ótkizdi. Atalǵan seriktestikterdiń 30 qyzmetkeri bir mezgilde dombyramen Qurmanǵazynyń «Adaı» kúıin oryndady.
