Atyraýda jolaýshy tasymaldaýǵa 170 avtobýs jetispeıdi
ATYRAÝ. QazAqparat - Búgingi kúni Atyraýda qalaishilik jáne qala aýmaǵyna qatynaıtyn 340 avtobýs bar. Qala ishi men móltek aýdandardy tolyqtaı qamtý úshin áli 170 avtobýstyń qajettiligi týyndap otyr.
Qalalyq turǵyn úı-kommýnaldyq sharýashylyǵy, jolaýshylar kóligi jáne avtokólik joldary bóliminiń basshysy Serikbaı Qazıevtiń málimetine súıensek, qazirgi satyp alynǵan avtobýstar tez eskirip isten shyǵady. Kóp jyldan beri qosymsha marshrýttar da qaralmaı keledi.
- Jańa yqshamaýdandar salynǵan saıyn olardyń júrý qashyqtyǵyn uzarta beremiz. Búgingi tańda 18 shaqyrymǵa deıin baratyn baǵdarlar bar, - deıdi Serikbaı Qazıev.
Bólim basshysy bul máseleni sheship, avtobýstardyń tarıfin azaıtýdyń da joldary baryn jetkizdi. Qazir qala ishinde avtobýstardyń quny 80 teńge. Jolaýshy tasymalyn júzege asyratyn mekemeler Uly Otan soǵysy ardagerleri men múgedekterine, 16 jasqa deıingi múgedek balalarǵa, zaǵıp jandarǵa, I, II top múgedekterine jáne 17 jasqa deıingi oqýshylarǵa sabaq mezgilinde marshrýttarǵa tegin mingizýdi qamtamasyz etip otyr. Sondaı-aq, zeınetkerler men eńbek ardagerlerine jolaqy qunyn 50% paıyz tóleýge jeńildikter berilgen.
S.Qazıevtiń aıtýynsha, jolaqy qunyn túsirýdiń joly - qalaǵa yqshamaýdandardan qatynaıtyn jolaýshylar úshin avtobýs almastyratyn beketter ornatý qajet. Qala aýmaǵanda qazir mundaı tórt beket bar. Olar temirjol vokzalynda, aerovokzalda jáne Balyqshy, Atyraý yqsham aýdandarynyń sońǵy aıaldamasynda.
- Taǵy da osyndaı tórt beket ashý qajet. Yqsham aýdandardan kelip jınalǵan jolaýshylar beketten túsip, qalanyń ishine barý úshin kelesi qalaishilik avtobýsqa otyrady. Sol kezde marshrýttardyń júrý qashyqtyǵy 9 shaqyrymǵa deıin qysqarady. Marshrýttardyń júrý shaqyrymy qysqarsa, avtobýstardyń tarıfteri de tómendeıdi. Qazir qala ákiminiń tapsyrmasymen osyǵan baılanysty transporttyq tujyrymdama daıyndalmaq. Alǵa qaraı tujyrymdama boıynsha jumys júrgizemiz, - dedi Atyraý qalalyq turǵyn úı-kommýnaldyq sharýashylyǵy, jolaýshylar kóligi jáne avtokólik joldary bóliminiń basshysy S.Qazıev.
