Atyraýda jol qurylysynyń barysyn jurtshylyq baqylaıdy
ATYRAÝ. QazAqparat - Atyraýda bıyl jol qurylysy jurtshylyqtyń qatań baqylaýynda bolady, dep habarlaıdy QazAqparat tilshisi.
«Joldyń jaǵdaıy - eldi oılantatyn ózekti máselelerdiń biri. Ol áleýmettik saýalnama málimetteri boıynsha oblys turǵyndaryn alańdatatyn máseleler reıtınginde úshinshi ne tórtinshi orynda turady. Bizdiń óńir jol salý men jóndeýge bıýdjetten bólinetin qarajattyń mólsheri jaǵynan kóshbasshylardyń qatarynda keledi. Sondyqtan da, bólinetin qarajat kóbeıgen saıyn, jurtshylyqtyń baqylaýyna degen qajettilik te arta túsedi», - deıdi Atyraý qalalyq máslıhatynyń hatshysy Qanat Ázimhanov.
Onyń sózine qaraǵanda, Atyraý qalalyq máslıhatynyń janynda TKSh máseleleri jónindegi komıssııa turaqty jumys istep, jurtshylyq baqylaý júrgizedi. Osy iske aýyldyq okrýg ákimderi, qoǵamdyq keńes músheleri jáne úkimettik emes uıymdardyń ókilderi tartylǵan.
«Áleýmettik jeli jáne ınternet-resýrstar arqyly qala turǵyndarynyń shaǵymdary men usynystary qabyldanady. Shıki tustar anyqtalǵan jaǵdaıda, tapsyrys berýshi arqyly merdiger uıymdy olqylyqty retteýge mindetteımiz», - deıdi Qanat Ázimhanov.
2018 jyly qalada jáne qala mańynda 211 km jolǵa asfalt tóseý josparlanyp otyr.
