Atyraýda jol-kólik oqıǵalary men jaraqat alý azaıdy
ATYRAÝ. QazAqparat – Karantın engizilgennen keıin Atyraý oblysynda jol-kólik oqıǵalary men jaraqat alýshylar sany edeýir azaıǵan, dep habarlaıdy QazAqparat.
Atyraý oblystyq aýrýhanasynyń bas dárigeri Saıyn Shomırovtyń málim etýinshe, karantın engizilgenge deıin travmatologııalyq bólimsheniń dárigerleri táýligine 150-200 patsıentti qabyldap kelgen. Al, 27 naýryzdan beri jaraqat alǵandardyń sany kúnine 30 adamǵa deıin qysqarǵan.
«Atyraý turǵyndary koronavırýs ınfektsııasynyń taralýyna baılanysty karantın talabyn oryndaýynyń nátıjesinde jaraqat alýshylardyń sany edeýir azaıdy dep oılaımyn. Jeke avtokólik qozǵalysyn shekteý de jol-kólik oqıǵalary men apat saldarynan zardap shegetinder qatarynyń azaıýyna áser etti»,- dedi Saıyn Shomırov.
Qazirgi ýaqytta Atyraý oblysynda koronavırýs ınfektsııasyn juqtyrýdyń 24 jaǵdaıy tirkelgen.
Óńirlik kommýnıkatsııalar qyzmetinde ótken brıfıngte 22 adam indetti qalaı juqtyrǵany málim etildi.
