Atyraýda jol boıynda sheteldik júrgizýshilerdi tonaǵan úsh kúdikti ustaldy
Oblystyq polıtsııa departamenti baspasóz qyzmetiniń málimetinshe, tonaý deregi 21 aqpanda tirkelgen.
«Jylyoı aýdandyq polıtsııa bóliminiń qyzmetkerleri osy derekke qatysty jedel izdestirý is-sharasyn júrgizdi. Atalǵan aýdannyń 18 jáne 20 jastaǵy úsh turǵyny 21 aqpanda «Atyraý-Aqtaý» tas jolynyń «Dossor-Qulsary» ýchaskesiniń 8-shaqyrymy tusynda Ózbekstan Respýblıkasynyń azamattaryn tonaǵany anyqtaldy. Kúdiktiler tapanshaǵa uqsas zatpen sheteldikterdi qorqytyp, 4 mobıldi telefon men 1 myń Reseı rýblin tartyp alyp, oqıǵa ornynan qashyp ketken», -dep habarlady departamenttiń baspasóz qyzmeti.
Qazir jol boıynda sheteldikterdi tonaǵan úsh kúdikti ustaldy. Úsh kúdiktige qatysty QR Qylmystyq kodeksiniń 191-babynyń 2-bóligimen (Jábirlenýshiniń ómirine nemese densaýlyǵyna qaýipti emes kúsh qoldanyp ne osyndaı kúsh qoldaný qaterin tóndirip tonaý) sotqa deıingi tergep-tekserý bastaldy.
Kúdiktiler ýaqytsha tergeý ızolıatoryna qamaýǵa alyndy.
Eske sala ketelik, budan buryn Atyraýda qoımadan ondaǵan jylý batareıasy men eseptegishter urlaǵan kúdiktiler ustalǵanyn habarlaǵan edik.
Qoımadan 87 dana jylý batareıasy, 15 qorapqa salynǵan 10 dana gaz eseptegishi men 20 dana sý eseptegishi urlaǵan 1992, 2001 jáne 2003 jyly týǵan úsh kúdikti ustaldy. Jábirlenýshige keltirilgen materıaldyq shyǵynnyń mólsheri 5 mln 325 myń teńgeni qurady.
Kúdiktilerge qatysty QR Qylmystyq kodeksiniń 188-babynyń 3-bóligimen sotqa deıingi tergeý amaldary júrgizilip jatyr.