Atyraýda jol apatynan 4 adam kóz jumdy
Oblystyq polıtsııa departamenti baspasóz qyzmetinen málim etkendeı, jol-kólik oqıǵasy 17 maýsymda bolǵan.
«Jergilikti ýaqytpen saǵat 16:15 shamasynda respýblıkalyq mańyzy bar Dossor-Qulsary-Beıneý tas jolynyń 10-shaqyrymy tusynda Lada Priora jáne Toyota Camry avtokólikteri soqtyǵysty. Jol-kólik oqıǵasynyń saldarynan Lada Priora avtokóligi otqa orandy. Kólikti tizgindegen 1992 jylǵy júrgizýshi men 22 jastaǵy jolaýshy, Camry avtokóliginde otyrǵan 1972 jylǵy jolaýshy oqıǵa ornynda mert boldy. Toyota Camry kóliginiń rólinde bolǵan 42 jastaǵy júrgizýshi dene jaraqaty saldarynan aýrýhanada kóz jumdy», - dep habarlady departamenttiń baspasóz qyzmeti.
Toyota Camry kóliginiń 2 jolaýshysy túrli dene jaraqatymen Maqat aýdandyq aýrýhanaǵa jetkizildi.
Patrýldik polıtsııa rotasy komandıriniń orynbasary, polıtsııa kapıtany Almas Zakarıevtiń aıtýynsha, oblys aýmaǵymen ótetin tas joldarda kólik aǵyny kóbeıgen.
«Patrýldik polıtsııa rotasynyń qyzmetkerleri kún saıyn júrgizýshilerge jol-kólik oqıǵasynyń aldyn alý úshin túsindirý jumysyn júrgizip jatyr. Kólik aǵynynyń artýyna baılanysty jolda júrý erejesin, jyldamdyq rejımin qatań saqtaýdy eskertemiz», - dep habarlady Almas Zakarıev.
Eske sala ketelik, budan buryn Atyraý oblysynda kólik aýdarylyp, sheteldik júrgizýshi men jolaýshy aýrýhanaǵa túskenin habarlaǵan edik.
Dossor-Qulsary-Beıneý baǵytyndaǵy tas jolda Chevrolet Cobalt avtokóligi aýdarylǵan. Jol-kólik oqıǵasyna Ózbekstan Respýblıkasy azamatynyń basqarý júıesin ıgere almaǵany sebep bolǵan. Sonyń saldarynan júrgizýshi men 1985 jyly týǵan jolaýshy túrli dene jaraqatymen aýrýhanaǵa jatqyzyldy.
