Atyraýda joǵary kerneýli elektr jelisine soǵylǵan júk kóligi órtendi
ATYRAÝ. QazAqparat – Atyraýda joǵary kerneýli elektr jelisine soǵylǵan «KamAZ» órtendi, dep habarlaıdy QazAqparat tilshisi.
Oblystyq Tótenshe jaǵdaılar departamentiniń málimetine súıensek, oqys oqıǵa 14 qyrkúıekte saǵat 12:00 shamasynda bolǵan.
«Atyraý qalasynyń «Bereke» yqshamaýdanyndaǵy «Shyǵys» bazarynyń mańynda «KamAZ» kóligi 10 myń volttyq elektr jelisine soǵylǵan. Júrgizýshi júkti túsirý úshin kóliktiń temir qorabyn kótergen. Sol kezde qorap baǵandar arasyna tartylǵan elektr symyna tıgen. Kóliktiń artqy dóńgelegi men qýat berý júıesi órtendi», - dep habarlady departamenttiń baspasóz qyzmeti.
Oqıǵa ornyna órt sóndirý jáne avarııalyq-qutqarý qyzmetiniń qyzmetiniń 4 qyzmetkeri men 1 arnaýly tehnıkasy jetti. Jarty saǵattan keıin órt tolyǵymen sóndirildi. Órtten eshkim zardap shekpegen.
