Atyraýda joǵarǵy qabattan qulaǵan 16 jasar bala kóz jumdy
Atyraý oblystyq polıtsııa departamentiniń baspasóz qyzmetinen málim etkendeı, oqıǵa keshe, 2 naýryzda bolǵan.
«Departamenttiń kezekshi bólimine keshe jergilikti ýaqytpen saǵat 23:30 shamasynda 2007 jyly týǵan jasóspirimniń joǵarǵy qabattan qulaǵany týraly habar tústi. Osy derekke baılanysty polıtsııa qyzmetkerleri oqys oqıǵanyń Atyraý qalasyndaǵy «Almagúl» shaǵyn aýdanynda bolǵanyn anyqtady. Jasóspirim osyndaǵy kópqabatty úılerdiń birinde joǵarǵy qabattan qulaǵan», -dep habarlady departamenttiń baspasóz qyzmeti.
Qazir polıtsııa qyzmetkerleri atalǵan derekke baılanysty sotqa deıingi tergep-tekserýdi júrgizip jatyr. Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy.
Eske sala ketelik, buǵan deıin Atyraýda 8 jasar balany buralqy ıt talap tastaǵanyn habarlaǵan bolatynbyz.
Atyraý oblystyq balalar aýrýhanasy travmatologııa bóliminiń meńgerýshisi Sergeı Hvannyń aıtýynsha, byltyr kóshede júrgen buralqy ıtten 462 bala zardap shekken.
Al, bıylǵy jyldyń basynan beri aýrýhananyń dárigerlerine ıt qapqan 32 bala júgingen. Zardap shekken balalar ár túrli dene jaraqatyn alǵan.
Sondaı-aq Atyraý oblysynda jasóspirimniń ólimine sebepker bolǵan qart júrgizýshi sottalǵanyn jazǵan edik.
Jylyoı aýdandyq sotynda jasóspirimdi qaǵyp, mert qylǵan 73 jastaǵy júrgizýshige qatysty qylmystyq is qaraldy. Júrgizýshi QR Qylmystyq kodeksiniń 345-babynyń 3-bóligimen aıyptalǵan.
Júrgizýshi sot úkimimen QR Qylmystyq kodeksiniń 345-babynyń 3-bóligimen kináli dep tanylyp, oǵan 3 jyl merzimge kólik quraldaryn basqarý quqyǵynan, 2 jyl 6 aı merzimge bas bostandyǵynan aıyrý jazasy taǵaıyndaldy. Atalǵan qujattyń 63-babynyń negizinde 2 jyl 6 aı merzimge shartty jazaǵa sottaldy.
Sottalýshydan jábirlenýshi taraptyń paıdasyna 5 mln teńge moraldyq zııan ótemaqysy óndirilgen.