Atyraýda joǵalyp ketken eki adamdy izdeýge tikushaq jumyldyryldy
Atyraý qalasynyń mańyndaǵy Alǵabas aýylynyń eki turǵyny 9 naýryz kúni saǵat 11:30 shamasynda mal izdeýge shyǵyp ketken. Eldi mekennen 50 shaqyrym qashyqtyqqa alystaǵan soń olarmen baılanys úzilgen.
«10 naýryzda departamenttiń dıspetcherlik pýltine eki adamnyń iz-túzsiz joǵalyp ketkeni týraly habar tústi. Osyǵan baılanysty departament qyzmetkerleri saǵat 13:25-te jol talǵamaıtyn TREKOL avtokóligimen joǵalǵan adamdardy izdeýge shyqty. Olardy izdestirý jumysyna saǵat 17:23-te «Qazavıaqutqarý» AQ-nyń tikushaǵy jumyldyryldy. Qutqarýshylar saǵat 17:47-de mal izdeýge shyǵyp, habarsyz ketken 58 jáne 54 jastaǵy er adamdardy ama-esen tapty. Olardyń densaýlyǵy qalypty, medıtsınalyq kómekti qajet etpedi», - dep málim etti departamenttiń qoǵammen baılanys tobynan.
Bir kúnnen soń tabylǵan eki er adam otbasymen, týystarymen qaýyshty.
Eske sala ketelik, buǵan deıin Atyraý oblysynda joǵalyp ketken malshy bir kúnnen keıin aman tabylǵanyn, tún ishinde qar qursaýynda qalǵan kólikten ana men bala qutqarylǵanyn habarlaǵan edik.
Sondaı-aq Atyraý oblysynda janarmaıy taýsylyp, dalada qalǵan kólikten 4 adam qutqarylǵan bolatyn. Aqtóbe oblysynyń Baıǵanın aýdanyndaǵy Mııaly aýylynan 4 adam kólikpen jolǵa shyqqan. Olar Atyraý oblysyndaǵy Qulsary qalasyna barmaq bolǵan.Alaıda, kóliktiń janarmaıy taýsylyp, jolda qalyp qoıǵan. Qutqarýshylar olardy Qulsary qalasynan 120 shaqyrym qashyqtyqtaǵy «Namaztaqyr» ýchaskesinen tapty.
