Atyraýda joǵalǵan shopan 6 kúnnen beri tabylmaı jatyr
ATYRAÝ. QazAqparat – Atyraý oblysynda 6 kúnnen beri joǵalǵan shopandy tappaı jatyr, dep habarlaıdy QazAqparat.
Oblystyq Tótenshe jaǵdaılar departamenti baspasóz qyzmetiniń málimetinshe, 10 naýryzda Isataı aýdanyndaǵy sharýa qojalyǵynyń shopany joǵalyp ketken.
«Fermerlerdiń aıtýynsha, 10 naýryzda eki shopan otardy óriske shyǵarǵan. Onyń biri – 60 jastaǵy azamat jańa týǵan qozyny vlfp, túıemen qystaýǵa bettegen. Al, ekinshi shopan keshke otardy qystaqqa ákelgen. Joǵalǵan shopandy izdeý sol kúni, 10 naýryzda bastaldy. Oǵan aýdandyq tótenshelikter men polıtsııa qyzmetkerleri jumyldyryldy» -dep habarlady departamenttiń baspasóz qyzmeti.
Alaıda, ázirge izdestirý jumysynan nátıje shyqqan joq. Soǵan baılanysty búgin, 16 naýryzda «Qazavıaqutqarý» RMK Atyraý fılıalynyń MI-8 tikushaǵy tartyldy.
«Bes saǵatqa jýyq áýeden izdestirý júrgizildi. Tikushaqpen Isataı, sondaı-aq kórshiles Mahambet jáne Inder aýdandarynyń Batys Qazaqstan oblysynyń aýmaqtyq shekarasyna deıingi shalǵaı ýchaskeler zertteldi. Tótenshe jaǵdaılar departamentiniń qyzmetkerleri shalǵaıda qaraýsyz qalǵan qystaýlardy da tekserdi» -dep málim etti departamenttiń baspasóz qyzmetinen.
Qazir jol talǵamaıtyn «Trekol» jáne ózge de kóliktermen 4 tótenshelik, 10 polıtseı, sondaı-aq joǵalǵan malshy jumys istegen sharýa qojalyǵynyń 2 qyzmetkeri jumyldyrylǵan izdestirý jumysy jalǵasýda.
Eske sala ketelik, budan buryn Atyraýda jumysyna ketken er adam izdestirilip jatqanyn jazǵan bolatynbyz.
