Atyraýda joǵalǵan qyrǵyz qyzy 11 jyldan keıin tabyldy
Oblystyq polıtsııa departamentiniń baspasóz qyzmetinen málim etkendeı, Qyrǵyzstan Respýblıkasynan 2011 jyly Atyraýǵa kelgen týystarymen renjisip qalǵan.
«Qyrǵyzstan Respýblıkasynan eki azamat 2011 jyly Atyraý qalasyna kıim-keshek satyp, saýdamen aınalysýǵa kelgen. Sol jyly Atyraýda biraz ýaqyt bolǵan soń ápkesi eline keri oralmaq bolyp, al, sińlisi osy qalada qalýǵa sheshim qabyldaıdy. Eki baýyrdyń arasy sol jyly ajyraǵan. Al, 2013 jyly sońǵy ret ekeýi telefon arqyly sóılesip, sodan keıin sińlisi baılanysqa shyqpaǵan. Apaly-sińliler arasyndaǵy baılanys 9 jylǵa úzilgen», -dep habarlady departamenttiń baspasóz qyzmeti.
Osy derekke baılanysty oblystyq polıtsııa departamenti bastyǵynyń buıryǵymen qurylǵan arnaıy jedel izdestirý toby joǵalǵan qyrǵyzstandyqty izdestirý jumystaryna kirisken. Keıin belgili bolǵandaı, qyrǵyzstandyq áıel týystarymen renjisip, baılanysty úzýge bel býǵan.
Týystary ony Atyraýǵa birneshe ret izdep kelgenimen, esh nátıje shyqpaǵan. Krımınaldyq polıtsııa basqarmasynyń qyzmetkerleri joǵalǵan qyrǵyz qyzyn izdeý is-sharasyn nátıjeli júrgizdi. Qazir ol ápkesimen, otbasymen qaýyshty.
«Bir-birimizdi 11 jyl boıy kórmegen edik. Onymen kezdesýdi 11 jyl boıy armandadym. Kezdesýdi asyǵa kúttim. Qýanyshymda shek joq», -dep kózine jas aldy sińlisimen kezdesken ápkesi.
Eske sala ketelik, budan buryn Atyraýda zábir kórgen 10 áıel men 23 bala daǵdarys ortalyǵyna ornalasqanyn habarlaǵan bolatynbyz.
